Фото: pixabay.com
Ауыл шаруашылығы вице-министрі Аманғали Бердалиннің айтуынша, Қазақстанда ет сатылатын нүктелерде оның қауіпсіздік талаптарына сәйкестігін күнделікті бақылау енгізу жоспарланып отыр.
Ауыл шаруашылығы министрлігі ветеринария туралы заңға сәйкес түзетулер әзірлеп жатыр. Өзгерістердің ішінде дүкен сөрелеріне жеткізілетін етті тексеруге кедергі келтіретін тосқауылдарды жою қарастырылған.
«Қазіргі таңда Кәсіпкерлік кодекс ветеринарлық инспекторларға жеке мекемелерге баруға тыйым салады. Тіпті оларға ветеринарлық станциялар мен пункттерді де тексеруге болмайды. Ол тиісті рәсімнен өтіп, прокуратура арқылы тіркелуі керек. Сондықтан біз қазір ветеринария туралы заңнан осы бапты алып тастағымыз келеді», деді Аманғали Бердалин.
Министрлік дүкендер мен сауда нүктелерінде күнделікті бақылау енгізуді жоспарлап отыр. Бұл шара сәйкес келмейтін өнімдердің сатылуын болдырмауға көмектеседі деп санайды вице-министр. Сонымен қатар, заң тексерілмеген етті сатқаны үшін жауапкершілікті қатаңдатады, тіпті қылмыстық жауапкершілікке дейін қарастырады.
