Сурет: zakon.kz
Облыстық білім басқармасының басшысы Марат Әбуовтің айтуынша, Махамбет ауданының Бейбарыс ауылдық округінде тышқан күрт көбейген. Осыған байланысты эпидемиялық ахуалдың нашарлауына жол бермеу, балалардың денсаулығын қорғау үшін алдын алу шарасы қабылданып отыр.
«Бейбарыс ауылдық округінде 2 мектеп пен 2 балабақша бар. Оқушылар дәріс алатын мектептің бірі – А.Байтұрсынұлы атындағы білім ордасы, екіншісі – Талдыкөл орта мектебі. Эпидемиялық қауіптің алдын алу үшін 19 қарашада аталған мектептер сабақ уақытша қашықтан оқыту форматына ауыстырылды. Дезинфекциялық жұмысты толық әрі сапалы жүргізуге «Балдырған» және «Балақай» балабақшасының қызметі уақытша тоқтатылды», дейді Марат Әбуов.
Оның дерегіне қарағанда, Бейбарыс ауылында орналасқан А.Байтұрсынұлы атындағы орта мектепте 573 оқушы дәріс алады. Ал Талдыкөл орта мектебінде 261 оқушы оқиды.
«Қазір білім ордаларында оқушыларға ыстық тамақ беріледі. Біз оқушылар ішетін тамақтың сапалы болғанын, санитарлық талаптың сақталғанын қалаймыз. Сондықтан арнайы мамандандырылған қызметтің мамандары Бейбарыс ауылдық округіндегі мектептер мен балабақшаларда дезинфекциялау, санитарлық бақылау жұмысын жүргізуді қолға алды. Мектептер мен балабақшаларда қауіп толық жойылғаннан кейін оқу-тәрбие үдерісін қалыпты режимге ауыстыру көзделіп отыр. Бұл шамамен бір аптаға созылуы мүмкін», дейді М.Әбуов.
Алайда аталған округте тышқанның көбеюіне не себеп болғаны әзірге белгісіз. Мамандар мұның себебін әлі нақтылаған жоқ. Махамбет ауданының әкімі Қайрат Нұрлыбаевтың айтуынша, қазір Бейбарыс ауылдық округіндегі Талдыкөл және Бейбарыс ауылында арнайы мекеменің қызметкерлері жеке тұрғын үйлердің аумағын улауды бастады. Шамамен 100 үйдің ауласын улау көзделген. Оның аумағы – 150 мың шаршы метр.
«Қолданылатын төртінші деңгейлі удың адамдар мен үй жануарларына зияны жоқ. Зиянкестермен күрес мекемесімен келісіп, 1000-нан астам үйге дәрі тараттық. Қосымша улағыш дәндер алынып жатыр. Дератизация жұмысына арнайы компаниямен келісім шарт жасақталып, Талдыкөл ауылындағы 47 үйде улау жұмыстары жүргізілді. Дератизациялау тұрғындардың келісіміне қарай кезең-кезеңімен жалғасады», дейді Қайрат Нұрлыбаев.
Әкімнің дерегіне қарағанда, былтырғы су тасқынынан кейін Талдыкөл ауылының маңында шөп биік өскен. Тышқандар шөп арасынан ін қазып, көбейген болуы мүмкін. Аталған ауыл маңындағы шөпті шабуға арнайы техника бөлінген.
Атырау облысы
