Тараптар осы жазда Астана мен Тяньцзиньде өткен Қазақстан мен Қытай басшылары келіссөздерінің қорытындысы бойынша қол жеткізген уағдаластықтарды іске асыру барысын қарастырды.
Кездесу күн тәртібінің басты мәселесінің бірі өзара сауданы әсіресе ауыл шаруашылығы саласында арттыру болды. Қытай статистикасына сәйкес биылғы қаңтар-қыркүйекте Қазақстан мен Қытай арасындағы сауда айналымы 35,4 млрд долларды (+7,4%) құрады, оның ішінде Қазақстанның Қытайға экспорты 13,5 млрд долларға (+9,9%) және Қытайдан импорт 21,9 млрд долларға (+6,9%) жетті.
«Қытай нарығы Қазақстанның астық экспорты үшін үлкен қызығушылық тудырады. Кейінгі екі жылда Қытайға астық экспорты бес еседен астам өсіп, 1,4 млн тоннаға жетті. Мемлекет басшыларының тапсырмаларын орындау үшін бізге Қытайға астық экспортын 2 млн тоннаға дейін ұлғайту бойынша қосымша шараларды қабылдау қажет», деді С.Жұманғарин.
Осы мақсатқа жету үшін Қытай әлі де логистиканы айтарлықтай баяулататын жекелеген шектеулерді сақтап отырғандықтан, шекарадағы астық қабылдау пункттерінің өткізу мүмкіндігін арттыру қажет екенін баса айтты.
Тараптар Қазақстанның Қытайға дақыл және мал экспортын кеңейту әлеуетін талқылады. Қазір екі ел арасында Қытай нарығына отандық 34 түрлі дақыл және мал өнімдерін экспорттау бойынша хаттамалар бар. Қытай нарығына жіберілген экспорттаушылар тізіміне 2 865 жергілікті кәсіпорын кіреді.
Қазақстан тарапы Қытайға қауын мен мақта тұқымын экспорттауды ашуға өтінім берді. Кездесуде жаңа өнімдерге арналған фитосанитарлық талаптарды үйлестіру үдерісін бастау ұсынылды. Мал шаруашылығы мен өңделген өнімдердің, әсіресе салқындатылған қой мен сиыр еті, ет өнімдері және құрғақ бие сүті экспортының көлемі мен түрлерін арттыруға ерекше назар аударылды.
Сондай-ақ Қазақстанның ветеринарлық қызметтері тексерулерінің нәтижесі бойынша Қазақстанның солтүстік-батыс және орталық аймақтарынан салқындатылған ет экспортына қойылған шектеулерді алып тастау мәселесі талқыланды.
Лю Гочжун екі елдің нарықтарына ауыл шаруашылығы өнімдерін жеткізу бойынша тиісті ведомстволар арасындағы үйлестіруді күшейтуді қоса алғанда, жоғары деңгейдегі уағдаластықтарды жүзеге асыру үшін бірлесіп жұмыс істеуді жалғастыруға дайын екенін білдірді.
