Басқарма төрағасы Сұлтанғали Кенжеқұлов «Kazakh Invest» компаниясының биылғы 10 айдағы қызметінің қорытындысы туралы баяндады. Сонымен қатар ұйымдық құрылымды өзгерту мәселелерін директорлар кеңесінің талқылауына шығарды. Атап айтқанда, орталық кеңседе қосымша лауазымдар енгізу, шетелдерде жаңа өкілдіктер ашу ұсынылды.
Үкімет басшысы «Kazakh Invest» компаниясы ұсынып отырған ұйымдық құрылымын қабылдамады, оны дайындаудағы үстірт көзқарасты атап өтті. Олжас Бектенов қолданыстағы штат саны шеңберінде компанияны сапалы түрде қайта құрылымдау қажеттігіне назар аударды. Жұмыстың әбден бюрократияланып, нақты нәтижелерге бағытталмай отырғанына қатысты сын айтылды.
Премьер-министр «Kazakh Invest» экономикаға қомақты инвестиция тартудың тиімді, икемді әрі ұтқыр құралына айналуға тиіс екенін атап өтті. Ол үшін үдерісті қайта құрылымдап, әрбір қызметкер үшін нақты тиімділік көрсеткіштерін енгізу қажет.
Ұлттық компания отандық өндірушілерді қолдау арқылы инвесторлар төңірегінде тұрақты өндіріс тізбегін құруға бағытталған.
«Бұл жұмысты күшейту қажет. Ең бастысы – нақты нәтиже. Сылдыр сөзден бұрын, жобаларды жүзеге асыруға, кәсіпорындарды іске қосуға мән беру керек», деп атап өткен О.Бектенов «инвестициялық тапсырыс» тетігін белсенді пайдалану қажеттігін баса айтты.
Бұл ресурстарды көмір мен мұнай химиясы, агроөнеркәсіп, машина жасау сияқты тағы басқа да келешегі зор салаларда экспортқа бағытталған өндіріс құруға бағыттауға мүмкіндік береді.
Жиын қорытындысы бойынша «Kazakh Invest» компаниясына күн тәртібі шеңберінде ұсынылған құжаттарды он күн ішінде пысықтау тапсырылды.
