Сурет: gov.kz
Денсаулық сақтау министрлігі әлеуметтік мәні бар, созылмалы аурулары бар пациенттерге медициналық көмектің көлемі мен сапасына қатысты кепілдік толық көлемде сақталатынына сендіреді. Жаңартылған тізбеге 11 нозология кіреді, оларға қатысты медициналық көмекпен, дәрі-дәрмекпен қамтамасыз ету тегін медициналық көмектің кепілдік берілген көлемі (ТМККК) шеңберінде-пациенттің сақтандыру мәртебесіне қарамастан ұсынылады.
ТМККК пакетінде мыналар қалады: туберкулез, АИТВ инфекциясы, созылмалы вирустық гепатит, бауыр циррозы, қатерлі ісік, психикалық, мінез-құлық бұзылысы, орфандық ауру, жіті миокард инфарктісі (алғашқы алты ай), нерв жүйесінің дегенеративті ауруы, ОНЖ демиелинизациялық ауруы, эпилепсия, цереброваскулярлық ауру (инсульттан кейінгі жағдай – бір жыл бойы). Тізбеге алғаш рет мыналар енгізілді: эпилепсия, цереброваскулярлық ауру (инсульттан кейінгі жағдай – бір жыл бойы). Мұндай шешім ұзақмерзімді бақылауды, тұрақты дәрі-дәрмекпен емдеуді қажет ететін ауыр неврологиялық аурулардан зардап шегетін азаматтарды әлеуметтік қорғауды күшейтуге бағытталған.
Диспансерлік науқастардың Бірыңғай тіркелімінің деректеріне сәйкес, елімізде эпилепсиямен ауыратын 94 мыңға жуық пациент, оның ішінде 31 мың бала тіркелген. Жыл сайын осындай диагнозы бар пациенттер 4 млрд теңгеге жуық сомаға 14 дәрілік затпен қамтамасыз етіледі. Эпилепсияны әлеуметтік мәні бар аурулар тізбесіне енгізу пациенттерге уақтылы, тегін, білікті медициналық көмекке қол жеткізуге кепілдік береді, сондай-ақ тұрақты дәрілік сүйемелдеуді қамтамасыз етеді.
Цереброваскулярлық ауруларды әлеуметтік мәні бар аурулар (ӘМА) тізбесіне қосу пациенттерді үздіксіз оңалтумен, динамикалық бақылаумен, қалпына келтірудің ең маңызды кезеңінде дәрі-дәрмекпен емдеуді қамтамасыз етуге, қайталанатын тамырлардың бұзылу қаупін азайтуға мүмкіндік береді. Инсульттан кейінгі алғашқы 12 ай функцияларды қалпына келтірудің, мүгедектіктің алдын алудың шешуші кезеңі, сондықтан мемлекет дәл осы кезеңде кепілдіктерді күшейтеді.
2026 жылғы 1 қаңтардан бастап міндетті әлеуметтік медициналық сақтандыру (МӘМС) пакетіне қант диабеті, балалардың церебральды сал ауруы, дәнекер тіннің жүйелік зақымдануы, ревматизм енеді. Бұл ретте медициналық көмектің көлемі қысқармайды, тек қаржыландыру көзі ғана өзгереді. Барлық сақтандырылған пациент МӘМС жүйесі шеңберінде емделуді, консультация мен дәрі-дәрмектерді тегін алуды жалғастырады.
Алғаш рет барлық әлеуметтік мәні бар аурудың бастапқы диагностикасы сақтандыру мәртебесіне қарамастан ТМККК шеңберінде жүргізілетін болады. Бұл ауруларды ерте анықтауды, емдеуді уақтылы бастауды қамтамасыз етеді.
Мемлекет азаматтардың жеңілдетілген санаттарына қатысты барлық кепілдікті сақтайды. Денсаулық сақтау министрлігі әлеуметтік мәні бар аурулардың тізбесін жаңарту көмекті қысқарту емес, қаржыландыру тетіктерін жетілдіру, ең осал пациенттерге қатысты кепілдікті күшейту екенін атап көрсетеді. Сақтандыру жарналары жергілікті атқарушы органдар есебінен төленетін азаматтардың әлеуметтік осал санаттарын (D, Е санаттары) сақтандыруды қаржылық қамтамасыз етуге ерекше назар аударылады.
2026 жылғы 1 қаңтардан бастап елімізде ӘМА-ның жаңартылған тізбесі күшіне енеді. Шешім «Кейбір заңнамалық актілерге міндетті әлеуметтік медициналық сақтандыру және медициналық қызметтер көрсету мәселелері бойынша өзгерістер мен толықтырулар енгізу туралы» Заңды іске асыру шеңберінде қабылданды. Бүгінде елімізде «қант диабеті» диагнозымен диспансерлік есепте 535 мыңнан астам адам, оның ішінде 5 625 бала тіркелген. Олардың барлығы қажетті дәрі-дәрмекті тегін алады.
