Облыстық мәдениет басқармасы басшысының орынбасары Саят Жүсіповтің айтуынша, осымен бесінші рет өтіп жатқан дәстүрлі байқау әу бастан-ақ балалар тақырыбына қалам тартып жүрген жас жазушылардың шығармаларын насихаттауды, олардың үздік туындыларын жеке жинаққа топтастыру арқылы өңірдегі балалар кітапханаларының кітап қорын толықтырып, байытып отыруды көздейді.
«Ыбырай атындағы әдеби байқаудың беделі жыл өткен сайын артып, жағрафиясы кеңейіп келеді. Мысалы, биыл Алматы, Астана қалаларынан, Қызылорда, Павлодар, Өскемен, Қарағанды, Жамбыл, Қостанай облыстарынан шығармалар келіп түсті. Байқау барысында еліміздің шалғай, шағын елді мекендерінде тұратын көптеген жаңа есімдердің танылуына жол ашылды. Мәселен, бес жыл ішінде Ыбырай байқауына 103 жазушы қатысыпты. Олардың шығармаларын алдымен сарапшылар кеңесі оқып шығады. Одан іріктеліп алынған туындылар қазылар алқасының қарауына жіберіледі. Келесі жылы Ыбырай Алтынсариннің 185 жылдығын атап өткелі отырмыз. Осыған орай, байқаудың тақырыптық аясын кеңейтіп, жүлде қорын молайту жағын қарастырамыз», деді Саят Жүсіпов.
Байқау қорытындысы бойынша, жас қаламгер Нұрбек Нұржанұлының «Қанатты шабандоз» повесі «Қазақ тіліндегі балалар мен жасөспірімдерге арналған ең үздік шығарма» және «Жас оқырмандардың таңдауы» атты екі аталымның жеңімпазы атанып, ақшалай сыйлық иеленді.
«Орыс тіліндегі балалар мен жасөспірімдерге арналған ең үздік шығарма» аталымының жүлдесіне жазушы Елена Клепикова мен ақын Ксения Земскова бірлесіп жазған «Қызыл кітаптың ғажайып әлемі» шығармасы лайық деп танылды.
Марапаттау рәсімінен кейін байқауға қатысқан туындылар енген «Таза бұлақ» жинағының тұсаукесер рәсімі өтті. Мұқабасы ЖИ көмегімен безендірілген жаңа жинақ өңірдегі балалар кітапханаларына таратылады.
Қостанай облысы
