Қазақстандық тарап өзара ынтымақтастықтағы оң серпінді атап өтіп, «Honeywell»-ге Қазақстанмен мүдделі ұзақмерзімді әріптестікке деген ниеті үшін алғыс білдірді. Аэроғарыштық технология, өнеркәсіптік автоматтандыру мен жаңа материалдар жасау саласында әлемдік көшбасшы болып саналатын компания Қазақстанда 1998 жылдан бері 500-ден аса жобаны жүзеге асырған.
Ерболат Досаев еліміз анағұрлым әртараптандырылған, экологиялық және технологиялық экономиканы қалыптастыруға арналған ауқымды экономикалық трансформацияны бастан кешіп жатқанын атап өтті. Осыған байланысты ел «Honeywell» өндірісін локализациялап, одан әрі кеңейтуге, технологияларды енгізуге мүдделі. Ол компанияның Қазақстанда Орталық Азия, Кавказ елдеріне, Әзербайжан және аймақтағы басқа да мемлекеттерге қызмет көрсете алатын аймақтық хабын құруды қарастыруды ұсынды.
Біздің тарап «Honeywell»-дің қатысуын кеңейте түсу үшін бірнеше әлеуетті бағытты белгіледі. Олар – Қазақстан кәсіпорындарында өнеркәсіптік қауіпсіздік пен мониторингтік мақсатта қолдану үшін «Honeywell» өнеркәсіптік қауіпсіздік және газ талдауын қадағалау жүйесін кеңейту, қалдықтарды азайту, энергия жинақтау жөніндегі ұлттық мақсаттарға қол жеткізу шеңберіндегі өнеркәсіп пен энергетика саласындағы жобалар.
Сондай-ақ кездесуге қатысушылар еліміздің мұнай-газ нысандарындағы технологиялық үдерістерді басқару жүйесіне ЖИ-шешімдерін енгізу туралы компанияның ұсынысын талқылады. ЖИ-агенттерді енгізу өндірістің тиімділігін, қауіпсіздігі мен сенімділігін арттыруға, үдерістерді оңтайландыруға және шығынды азайтуға мүмкіндік береді.
