Фото: gov.kz
Оқу-ағарту министрлігінің мәліметінше, соңғы бір жылда колледждерге шефтік қамқорлық көрсететін кәсіпорындар саны да 8 есеге артып, 4,1 мыңға жетті. Кәсіпорындар оқу орындарының материалдық-техникалық базасын нығайтуға, оқу бағдарламаларын жетілдіруге және түлектердің жұмысқа орналасуына белсенді қолдау көрсетіп келеді.
Жұмысқа орналасу кепілдігі бар мақсатты тапсырыстар аясында бұған дейін кәсіпорындар жыл сайын шамамен 10 мың студентті қабылдаса, биыл бұл көрсеткіш 13 мыңға жетті. Мұндай өсім еңбек нарығының нақты сұранысына сай мамандар даярлау ісінің нәтижелілігін көрсетеді.
Сонымен қатар ұлттық «Maman» бағдарламасы аясында кәсіби бағдарлау жүйесі жаңартылуда. Жоғары сынып оқушыларына арналған пилоттық жоба іске қосылып, олар жалпы білім беру пәндерін мектептерде, ал кәсіби даярлықты колледждерде игеруде. Осылайша, 11-сыныпты аяқтаған түлектер аттестатпен бірге орта техникалық білім туралы диплом да алады. Биыл алғашқы 905 оқушы еңбек нарығына кәсіби біліктілікпен шықты.
Жасөспірімдердің ерте кәсіби бағдарын қолдау мақсатында әр мектепке арнайы педагог кәсіби бағдар беруші лауазымы енгізіліп, 825 бейіндік сынып ашылды. Бұл шаралар оқушыларға мамандықты саналы таңдауға көмектесіп, олардың еңбек нарығына даярлығын күшейтеді.
