Сурет: janabastau.kz
Президенттік орталықтың директорының орынбасары Серік Сыдықов жиынға қатысушыларды Конституция күнімен құттықтап отыз жылдықта Конституциямыздың түрлі сыртқы және ішкі сын-қатерлерге төтеп бергеніне қатысты ойын ортаға салды.
«Әрине, конституциялық реформалар аяқталды дей алмаймыз. Алдағы уақытта реформалар үздіксіз жүре береді. Конституциялық нормаларды өзектендіру және олардың іске асырылуын бақылау бойынша әлі де көп жұмыс атқарылуы қажет. Меніңше, конституциялық реформаны жасау тек саяси ерік-жігерге байланысты емес. Бұл орайда реформаларға қоғамның дайын болуы аса маңызды. Сол себепті де біз мемлекетпен қатар қоғамдық билікті күшейтуге күш жұмсауға тиіспіз», деп атап көрсетті.
Ал «Respublica» партиясының төрағасы, Парламент Мәжілісінің депутаты Айдарбек Ходжаназаров отыз жыл ішінде Конституция тәуелсіздікті нығайтуға, қоғамдық келісімді сақтауға және демократиялық мемлекет құруға берік тірек болғанына тоқталды.
«Ата заң Қазақстанға қалыптасудың күрделі кезеңдерінен өтуге, өтпелі кезеңнің қиындықтарын еңсеруге және қазіргі қоғамның негізін қалауға мүмкіндік берді. Біз бүгін Президенттік орталықпен бірлесе отырып, еліміздің Конституциясының тарихын ғана емес, еліміздің құқықтық құжаттың болашағын да талқылап отырмыз. Қазіргі қоғам үшін құқықтың үстемдігі, әділет, барлық азаматқа тең мүмкіндіктер туғызу, жеке адамның қадір-қасиетін құрметтеу сынды негізгі қағидаттары өте өзекті. Бұл мәселелерді жалаң ұран етпей, мемлекеттің ішкі даму бағытын белгілейтін, келешек Қазақстанның қандай болатындығын айқындайтын нақты бағдарға айналдыруымыз керек. Дәл осы құндылықтар біздің Әділетті Қазақстанға деген ортақ көзқарасымызды қалыптастырады», деді А.Ходжаназаров.
Парламентаризм институтының директоры Наталья Пан кейінгі жылдары жасалып жатқан бірқатар маңызды реформаға қатысты ой-пікірін ортаға салды.
«Бүгінгі таңда демократиялық негіздерді нығайтуға, азаматтардың құқықтары мен бостандықтарын кеңейтуге, сондай-ақ неғұрлым теңдестірілген билік жүйесін құруға бағытталған реформалар сәтті жүргізіліп жатыр. Атап айтсақ, 2022 жылы Президенттің бастамасымен өткен референдумнан кейін Парламенттің өкілеттігі кеңейтілді, азаматтардың тікелей жүгіну құқығымен Конституциялық сот құрылды, Президенттің партиялық қызметтері ретке келтірілді, парламенттік бақылау күшейтілді», деді.
Іс-шара аясында азаматтық қоғам мен құқық қорғау ұйымдарының сарапшылары түрлі тақырыпта баяндамалар жасап, конституциялық құрылысты дамытудың негізгі бағыттары мен құқықтық сауаттылық деңгейін арттыру, сондай-ақ жастар мен азаматтардың конституциялық мәдениетті қалыптастыруға белсенді қатысуын ынталандыру, т.б секілді мәселелерді қоғам назарына ұсынды. Жиын соңында сарапшылық кездесудің қорытындысы ретінде арнайы Қаулы қабылданды.
