Іс-шара барысында әлемнің әр түкпірінен және Орталық Азия елдерінен келген халықаралық сарапшылар баяндама оқып, өз тәжірибесімен бөлісті. Мәселен, Наоми Мваурах (Кения) инклюзивті цифрлық сауаттылық құрылымын әзірлеу бойынша жобаларын таныстырды. Спикердің айтуынша, Кениядағы қоғамдық кітапханалар кейінгі он жылда инклюзивті цифрлық сауаттылықты дамытуда үлгі боларлық тәжірибе жинақтаған. Бұл бағыттағы жұмыстар бірқатар маңызды бастамалар арқылы жүзеге асып отыр.
«Біріншіден, ұлттық кітапхана қызметі (KNLS) ел бойынша ондаған кітапхананы компьютерлермен және интернетпен жабдықтап, оларды тек оқу орны емес, заманауи цифрлық білім орталығына айналдырды. Екіншіден, EIFL және UNESCO ұйымдарының қолдауымен кітапханашылар арнайы даярлықтан өтті. Бұл оларға өз кезегінде қоғам мүшелерін цифрлық сауаттылыққа үйретуге мүмкіндік берді. Үшіншіден, Worldreader ұйымымен бірлескен Leap жобасы мыңдаған адамға цифрлық кітаптарға қол жеткізуді жеңілдетіп, кітапханаларды цифрлық оқу хабына айналдырды. Инклюзивтілік бағытында да айтарлықтай қадам жасалды. Мысалы, inABLE бастамасы көзі нашар көретін және зағип оқырманға арналған арнайы кітапханаларды ашып, Braille кітаптармен, ірі қаріпті ресурстармен қамтамасыз етті», дейді Наоми Мваурах.
Сондай-ақ Доктор Неза Сингх (Үндістан) қауымдастықтарды цифрлық сауаттылық арқылы дамыту жолдарын ұсынса, доктор Шэрон Янг (АҚШ) цифрлық сауаттылықты оқыту әдістемесінің тиімді тәсілдерін түсіндірді. Ал Доктор Лейли Сейфи (Иран) ауылдық аймақтардағы фермерлердің цифрлық сауаттылығын арттырудағы тәжірибесін ортаға салды. Атап айтсақ, Иранның Систан мен Белуджистан аймағындағы жергілікті халықтың жаңа технологияларға деген ынтасы мен қызығушылығы жоғары. Бірақ көптеген ауылда интернет тұрақсыз, компьютер немесе смартфон саны жеткіліксіз. Осыдан барып цифрлық дағдыларды меңгеру және күнделікті қолдану деңгейі төмен болып отыр.
«Ұлттық деңгейде цифрландыру саясаты қабылданғанымен, оның ауылдық өңірлерге, әсіресе Систан мен Белуджистан сияқты шекаралық аймақтарға нақты әрі мақсатты түрде жетуі әлі де жеткіліксіз. Бұл аймақтағы фермерлер көбіне дәстүрлі тәжірибеге сүйеніп отыр, ал цифрлық шешімдер ауылшаруашылыққа толық енген жоқ. Сондай-ақ ауылшаруашылық білім беру орталықтары мен ақпараттық жүйелерді күшейту қажеттілігі анық байқалады. Егер осы орталықтар цифрлық қызмет көрсету бағытында жұмыс істесе, фермерлер нарыққа шығып, заманауи технологияны өз еңбегінде қолдануға әлдеқайда бейімделе түсер еді», деді Лейли Сейфи.
Айта кетейік, аталған конференция инклюзивті цифрлық сауаттылықты дамыту арқылы түрлі қауымдастықтарды біріктіру, халықаралық тәжірибе алмасу және заманауи технологияларды кітапхана қызметінде тиімді қолдану жолдарын талқылау мақсатын көздейді.
Конференция IFLA Ақпараттық сауаттылық секциясының ұйымдастыруымен жоғары деңгейде өтті дейді қатысушылар. Іс-шара соңында Ғылыми кітапхана директоры Бақытжан Оразалиев алқалы жиынның маңыздылығына тоқталып, оның кітапхана ісін дамытудағы және халықаралық әріптестікті нығайтудағы рөлін атап өтті.
Басқосу барысында презентациялар, воркшоптар мен нетворкинг өткізіліп, қатысушыларға кәсіби даму мүмкіндігі ұсынылды. Сондай-ақ қонақтар университет пен кітапхананы таныстыру турына қатысты.
