Сурет: bluescreen.kz
Қызмет кемінде бір семестр білім алған әскери оқу орындарының бұрынғы курсанттарына арналған. Өтініш цифрлық форматта қалыптастырылады, ал қажетті деректердің басым бөлігі мемлекеттік ақпараттық жүйелерден автоматты түрде жүктеледі. Бұл үдерісті барынша оңай әрі ыңғайлы етеді. Алайда өтінішті оқудан шығарылған сәттен бастап бір жыл ішінде ғана беруге болатынын ескеру қажет.
Қызметті пайдалану үшін «eGov Mobile» мобильді қосымшасында «Қызметтер», «Әскери есепке алу» бөлімдеріне өтіп, «Қазақстан Республикасы Қорғаныс министрлігінің әскери оқу орындарына қайта қабылдау» қызметін таңдау қажет. Содан соң оқу орны мен оқудан шығарылған мерзім туралы ақпаратты көрсетіп, жеке деректерді өңдеуге келісім беріп, қажетті құжаттарды жүктеу керек. Соңғы қадам – ЭЦҚ немесе баламалы тәсілдер арқылы өтінішке қол қою қажет.
Қызмет тегін ұсынылады, құжат 20 күнде дайын болады. Өтінішті қарау нәтижесі «Жеке кабинет тарихы» бөлімінде қолжетімді болады.
Айта кету керек, «Қазақстан Республикасы Қорғаныс министрлігінің әскери оқу орындарына қайта қабылдану» қызметі eGov.kz порталында да қолжетімді. Бұл жаңарту Цифрлық даму, инновациялар және аэроғарыш өнеркәсібі министрлігінің Мемлекеттік көрсетілетін қызметтер комитеті, «Ұлттық ақпараттық технологиялар» АҚ және Қорғаныс министрлігінің бірлескен жұмысы нәтижесінде іске қосылды.
