Таныса келе сөйлескенімізде, Гүлзар атақты әнші Игілік Омаровтың немересі болып шықты. Әкесі Ғабдрахман бір кездері Жаңаарқа ауданын басқарғаны есімізге түсті. Қазір Америкада өнерін шыңдап жүрген Гүлзардың ол жақтағы лақап аты Гүлзар Габман, әлеуметтік желілерден де осылай іздесе шығады.
Әнші 2022 жылы «Viva-Music Carnigie Hall» байқауына қатысып, бірінші орыннан көрініп, жеңімпаз танылса керек. Онда халық аузында кең таралған Үлебайдың «Дударайын» құйқылжытқан екен. Содан бері үш жыл өткенде Гүлзар атақты сахнаға қайта көтеріліп отыр. Бұл жолғы құрметтің орны бөлек. Себебі мен деген әлемдік сахнагерлердің маңдайына жазыла бермеген концерт залының ұжымы мен аталған байқауды ұйымдастырушы тарап әншіні аттай қалап, құрметті қонақ ретінде шақырып, бір емес, екі бірдей қазақ әніне орын беріп отыр. Гүлзар шырқамай қалсын ба? Бұл жолы халық әні «Әгугай» мен ел арасына Игілік Омаровтың орындауында кең таралған Садық Керімбаевтың әні «Ақеркені» орындапты. «Битлз» тобы, Лайза Миннелли, Фрэнк Синатра, Андреа Бочелли, Мария Каллас сынды әлемдік жұлдыздар өнер көрсеткен залда қазақ қызының ән шырқауы, әрине, тарихи оқиға дер едік. Мұны өзі де осылай шамалап отырғанын айтады әнші.
«Мені қолдап, қошеметтеп келген осындағы Қазақ қауымдастығы өкілдеріне алғысым шексіз» дейді Гүлзар Ғабдрахман.
