Жас геологтер олимпиадасы Геология комитетінің қолдауымен «Жас геолог» корпоративтік қоры мен Геологиялық барлау колледжінің ұйымдастыруымен өткізіліп жатыр. Жарыстың демеушілері – Kazakhmys, ERG, Kazzinc, Yer-Tai, Геокен, «Алел» қаржы-инвестициялық корпорациясы, «Ембімұнайгаз», «ProLabSupport» және «Solidcore Resources» компаниялары.
Олимпиаданың ашылу салтанатында демеушілердің бірі «Kazakhmys Barlau» компаниясы атқарушы директоры Қадыржан Қаулдашев жарыстың басты мақсаты жас геологтерді қолдау екенін жеткізді.
«Біз осы сайысты өткізе бастаған кезде елімізде небәрі жеті-сегіз команда ғана болатын. Қазір олардың саны жиырмадан асты. Бүгінде олар тіпті халықаралық олимпиадаларда жүлде алып жүр. Олимпиаданың мақсаты – жастарды ерте кәсіптік бағдарлау, оқушылардың геология ғылымдарын оқуға деген қызығушылығын, геологияны ғылым ретінде және оның қолданбалы маңыздылығын арттыру, дарынды балаларды анықтап, оларды қолдау, оқушылардың назарын геоэкология және жер қойнауын қорғау мәселелеріне аудару. Сондықтан барша қатысушыларға сәттілік тілейміз», деді компания өкілі.
Жарыс қорытындысында жекелеген пәндерде жеңіске жеткен оқушылар Satbayev University, Қазақстан-Британ техникалық университеті, С. Өтебаев атындағы Атырау мұнай және газ университеті, Ә.Сағынов атындағы Қарағанды техникалық университеті сынды жетекші жоғары оқу орындарының білім гранттарына ие болатыны да айтылды.
«Жас геологтер олимпиадасы – болашақ мамандарды даярлауға жол ашатын кәсіби алаң ғана емес, сонымен бірге өскелең ұрпаққа туған жерге деген сүйіспеншілік пен патриоттық сезім қалыптастыратын тағылымды бастама. Оған еліміздің 15 өңірінен 180 талапкер қатысып жатыр. Қатысушылар палеонтология, минералогия және петрография, магнитометрия, гидрогеология, геологиялық қима жасау, мұнай мен газды іздеу, дала жағдайында тұрақ ұйымдастыру және шлихті сынау секілді бағыттар бойынша бақ сынайды», дейді ұйымдастырушылар.
Жарыстың әділқазылар алқасының құрамына гранттық бағдарламаға қатысушы жоғары оқу орындарының беделді профессорлары мен білікті оқытушылары, сондай-ақ «Kazakhmys Barlau», «Qazaq Geophysics» және «ERG» компанияларының жетекші мамандары бар.
«Қазылар алқасы Satbayev University, Қазақстан-Британ техникалық университеті, Семей қаласының Геологиялық барлау колледжінің оқытушылар құрамынан жасақталды. Сайыс қорытындысы бойынша ең үздік жас геологтер командасы анықталады. Сондай-ақ осы олимпиада аясында үздік жас геологтердің де есімдерімен танысатын боламыз. Олимпиада 15 шілдеге дейін жалғасады. Жеңімпаздар еліміздің ең үздік ЖОО-лары мен колледждерінде оқу гранттарын иеленеді. Олимпиаданың жабылу рәсімі 14 шілдеге жоспарланған», дейді бас төреші Нұрғаным Есімханова.
Ұйымдастырушылардың айтуынша, бұл – білім бәйгесі ғылым саласында жастардың танылуына таптырмас мүмкіндік. Байқауымызша, жарысқа қатысқан жастардың көбі аталған олимпиадаға екінші рет қатысып отыр екен. Солардың бірі – жетісулық Ақжол Болат.
«Осы екінші республикалық жас геологтер олимпиадада сегіз түрлі жарыс болады, сол сегіз жарыстың мен мұнай мен газ іздеу және минералогия жарыстарына қатысамын. Бұл олимпиада – білім деңгейімізді шыңдай түсетін ең маңызды сайыс. Сондықтан барша қатысушыларға сәттілік тілеймін», дейді ол.
Абай облысы
