Сыйға тартылған киіз үй бір мезетте 150-ге жуық адамды қабылдай алады. Ұлттық нақышта безендірілуіне аудан кәсіпкерлері ұйытқы болып, қолдау көрсеткен екен. Кезінде Жүсіпбек Аймауытұлы жазған, Семейдегі талай тарихтың куәсі болған киелі орын Түйемойнақ аралында тігілген киіз үйдің қала тұрғындары мен қонақтарына есігі ашық. Мұнда келушілер серуендеп жүріп ұлттық тағамдардан дәм тата алады.
Киіз үйдің ашылуына облыс әкімі Берік Уәли, Мақаншы ауданының ақсақалдары мен тұрғындары қатысты.
«Абайдың тойына тартуды алғаш болып облысымыздың шеткі, шекарадағы ауданы Мақаншы өңірі бастап жатқанының үлкен мағынасы бар деп ойлаймын. Бұл – басқа аудандарға үлгі боларлық іс, игі бастама», деді өңір басшысы.
Облыс әкімі осыдан үш ай бұрын Мақаншы ауданына барған сапары аясында кезінде өнерімен елді тамсандырған «Інжу-Маржан» ансамблін қайта жандандыру қажеттігін айтқан болатын. Бүгінде оған тиісті қаржы бөлініп, ансамбль жұмысын қайта жандандыра бастады. Оны айтып отырған себебіміз, аталған іс-шара аясында «Інжу-Маржан» ансамблі жиналғандарға өнер көрсетті.
Абай облысы
