Қос спортшы спорттың ең ауыр әрі күрделі түрі пауэрлифтингтен ел намысын қорғап, төрткүл дүниені тамсандырып келеді. Жақында Норвегияның Драммен қаласында пауэрлифтингтен әлем чемпионаты өтті. Байрақты бәсекеге әлемнің 14 елінен 1400-ден астам зілтемірші қатысып, өзара мықтыны анықтады. Осы чемпионатта әкелі-балалы спортшылар ел байрағын көкке көтерді.
Дәрібай Қараманұлы додада 70 жастан асқан ардагерлер арасында, 93 килоға дейінгі салмақ дәрежесінде өнер көрсетті. Нәтижесінде, пауэрлифтингтің классикалық түрінен қола, арнайы жабдықпен көтеруден алтын медаль еншіледі. Осылайша, ардагердің халықаралық жарыстардан алған медаль саны 22-ге, әлем біріншілігінен алған жүлде саны 10-ға жетті. Оның бесеуі алтын, төртеуі күміс, біреуі қола жүлде. Осы уақытқа дейін Азиядан он алтын, екі күміс медаль еншілепті.
Ұлы Абдулкәрім Қараман да чемпионатта қос алтынға қол жеткізді. Спортшы өз салмағында жарыстың классикалық түрінен 190 килограммды бағындырып, қара үзді. Арнайы жабдықпен көтеру аталымында да 245 кг көтеріп, қарсыластарына еш мүмкіндік бермеді.
– Абдулкәрім осы чемпионатта халықаралық төрешілер қауымдастығының қатарына еніп, төрешілік етті. Әрі өзі де сайысқа түсіп, қос алтынның иегері атанды. Ұлым шетел жарыстарында 20 медаль еншілеген. Әлем чемпионатынан жеті алтын, жеті күміс, Азия біріншілігінен алты алтын таққан, – дейді Дәрібай Қараманұлы.
Айта кетейік, ұлттық құрама спортшылары қос сайыста да жалпыкомандалық есепте көш бастады. Ерлер арасында сынға түскен ақтаулық Асқар Шоқанов абсолюттік чемпион атанды.
Дәрібай ақсақал әлемдік рекордты қайталаған спортшы. Өз салмақ дәрежесінде 180 кг зілтемір көтерген. 56 жасынан бастап пауэрлифтингке ден қойған ақсақал Азия біріншілігінде Гонконг, Филиппин, Үндістанға барды. Әлемдік біріншілікте АҚШ, Чехия, Жапония төрінде өнер көрсетті.
– Мен инженер-геодезист болып жұмыс істедім. Құбыр тартып далада жүргенде бос пластмасса құтыларға құм толтырып, көтеріп жаттығатын едім. Содан әлемдік деңгейге шықтым. Алғаш рет 2008 жылы Гонконгтегі Азия біріншілігінде күміс жүлдегер атандым. Одан кейін Филиппинде алтын алдым. 2012 жылы АҚШ-та күміс иеленіп, Халықаралық дәрежедегі спорт шебері нормасын орындадым, – дейді Д.Оспанов.
Осыдан екі жыл бұрын Президент Қасым-Жомарт Тоқаев Ақордадан Ақадырдағы пауэрлифтинг чемпионы Дәрібай Оспановқа арнайы тарту-таралғы беріп жіберген еді. Алғыс хат пен арнайы тартуды өңір басшысы Ермағанбет Бөлекпаев табыстады. Президент чемпионға Алғысхатпен бірге естелік сағат, Бурабай шипажайына жолдама сыйлады. Облыс әкімдігі де чемпионды құр қол жібермей, Ақадырдың спорт мектебіне халықаралық деңгейдегі штанга жиынтығын алатын 10 млн теңге сертификат тарту етті.
Қарағанды облысы
