Фото: gov.kz
Маңғыстау облыстық табиғи ресурстар және табиғат пайдалануды реттеу басқармасының басшысы Сәбит Дүйсекеновтің айтуынша аймақта «Таза Қазақстан» акциясы аясында ауқымды жұмыстар атқарылған.
«Биыл экологиялық науқанға облыс бойынша 25 мыңнан астам тұрғын қатысып, 4200 түп ағаш отырғызылды. Іс-шара барысында 448 техника жұмылдырылып, жалпы көлемі 3540 тонна тұрмыстық және құрылыс қалдықтары шығарылды. Сондай-ақ, азаматтардың экологияға қатысты шағымдары мен ұсыныстары «Tazaqazaqstan.kz» платформасы арқылы тұрақты түрде қабылданып, уақытылы жауаптар берілуде», деді Сәбит Дүйсекенов.
Өткен жылы ғарыштық мониторинг нәтижесінде 68 қоқыс алаңы анықталып, оның 64-і жойылған. «Кіші Оймашы» көлінің маңында 540 тонна қоқыс шығарылып, тазалық жұмыстары жүргізілген.
Сондай-ақ, «Қошқар-Ата» қалдық қоймасын қалпына келтіру жұмыстары дайындық кезеңінде. 2025-2027 жылдары 400 гектар аумаққа сексеуіл көшеттері отырғызылады деп жоспарланған.
Алина ҚАЙРАТҚЫЗЫ, ЕҰУ студенті
