Ауылдық мектептерде білім нәрін сіңіріп жатқан зерек шәкірттерге, түрлі білім сайысы мен байқау жүлдегерлеріне «Қазақстан халқына» қоры есебінен және меценаттардың қаржысына лагерьлерге жолдама беріліп жатыр.
Облыс бойынша 334 мектеп жанындағы лагерьлерде 38 155 оқушы, 357 бейіндік лагерьде 51 615 оқушы демалады. Биыл «Демалуға жолдама сыйла» акциясы жалғасын тауып, өңір кәсіпкерлері қала сыртындағы лагерьлерге 591 жолдама сатып алды. Ерекше қабілеті бар балалар үшін қалалар мен аудандар орталықтарындағы психологиялық-педагогикалық түзету кабинеттерінде, 4 арнайы мектепте лагерьлер жұмыс істеп тұр.
– Жаппай оқыту қорының қаражаты есебінен әлеуметтік қорғалмаған отбасылардан шыққан және жетімдер есебінде тұрған 13 мыңнан аса бала мектеп жанындағы және қала сыртындағы лагерьлерде демалыспен, сауықтырумен қамтылатын болады. Осы бағытта жаппай оқыту қорынан 235 млн теңге бөлінсе, балалар үйінің 334 тәрбиеленушісіне 314 млн теңге қарастырылған. Биыл облыс бойынша қала сыртындағы 11 лагерьде бес мыңға жуық бала демалады деп жоспарланған. Жеңілдікпен немесе тегін жолдамамен баратын оқушылардан бөлек, ақылы жолдамалар да үлестірілді. Мұндай лагерьлерде балалар 15 күн демалады. Ақылы лагерьлердің төлемақысы 35 мың теңгеден басталады, –дейді өңірлік білім беру басқармасы тәрбие және қосымша білім беру бөлімінің басшысы Гүлдана Теміржанова.
Лагерьлердің материалдық-техникалық базасын нығайтуға облыстық бюджеттен 52 млн теңге бөлінген. Ал мектептегі еңбек жасақтарына, абаттандыру және көгалдандыру бригадаларына, мектеп орманшылықтарына 2 200-ден астам жоғары сыныптың оқушылары тартылады.
Екібастұз қаласы биыл да оқушылар үшін дәстүрлі этноауыл нақышындағы жазғы демалысты ұйымдастырып жатыр. Мектептер жанында және «Қайнар» шығармашылық орталығында жалпы саны 16 киіз үй тігіліп, балалар күн сайын халқымыздың ұлттық салт-дәстүрінен сусындайды. Биыл мұнда «Басқұр тоқу» жобасы басталған. Қолөнер шеберлері мектеп оқушыларына ежелгі қазақ қолөнерінің қыр-сырын меңгеруге мүмкіндік ұсынады. Бастаманың аясында киіз басу өнері мен киіз үйге арналған дәстүрлі оюлы басқұр тоқуды үйреніп жатыр. Мұндай ерекше лагерьлер ұлттық рухты жаңғыртып, жас ұрпаққа ата-бабамыздың асыл мұрасын, бай салт-дәстүрін насихаттауды мақсат етеді. Балалар ою-өрнек қиып, қазақтың ұлттық тағамдарын дайындауды үйренеді, қолөнер бұйымдарын жасап, шеберліктерін шыңдайды. Күн сайын домбыраның күмбірі естіліп, терме мен күй арқылы рухани азық алуға мүмкіндік беріледі.
– Ұлттық этнофестиваль жобасы бойынша жазғы лагерьлеріміздің жұмысы әр алуан бағытта құрылған. Мәселен, ер балалар қамшы өрумен танысса, қыз балалар түрлі тоқыма өнерлерін меңгереді. Барлық мектепте бестемше ойынына мән беріліп жатыр. Бестемше – тоғызқұмалақ сияқты математикалық ойын. Балабақшадан бастап енгізіп, балалардың жылдам есептеу зейінін арттыруға назар аударудамыз. Ойынды кез келген жерде ойнауға болады. Бұған қоса еліміздің ұлттық ойындар академиясымен байланысып, асықтың бес түрі бойынша асық жиынтықтарын алдырттық. Оқушыларымыз демалыс кезінде бес кеней, бес асық және т.б. асық ойындарын ойнайды. Тағы бір бағыт – зергерлік, қыш құмыралар жасау өнері. Оған қызығушылар саны да көп екенін байқаймыз. Күн сайын балаларымыз лагерьлерде қазақ әндері мен билері, күйлер, шешендік сөздер, бата беру бойынша сайыстарға қатысады, – дейді Екібастұз қалалық білім беру бөлімінің басшысы Лаура Дисюпова.
Кеншілер қаласы мен оған қарасты ауылдарда 40 мектеп бар, олардың барлығында жазғы лагерьлер жұмыс істеп тұр. Жалпы саны 22 мыңға жуық бала қызықты демалыспен қамтылған. Педагогтер тәртібі қиын, осал топтағы жасөспірімдерді де ұмытпаған. Әр күні кешкілік есепте тұрған 100-ден астам баланы ойын алаңдарына шақырып, түрлі сайыстар ұйымдастырады. Қала бойынша 600 бала еңбек жасақтарына тартылса, 4 мыңнан астам оқушы жергілікті кәсіпорындарда жаз айларында еңбек етіп жүр.
Маусымның соңына таман жазғы демалыста жүрген 200-ден астам екібастұздық жас өренді этносапар күтіп тұр. Баянауылдағы Торайғыр ауылында 15 киіз үйден тұратын этноауыл құрылып, балалар сонда бірнеше күн тынығады. Ұлттық ойындар, табиғат аясындағы танымдық серуендер мен шығармашылық бағыттағы іс-шаралар балалар үшін есте қаларлық сапар болмақ.
Оқушылардың демалысын қызықты өткізу Баянауыл ауданында да барынша ескерілген. 26 мектептің 23-інде жазғы мектеп жанындағы алаңдар жұмысын бастап кетті. 1–10-сыныптарда оқитын 3 967 бала толығымен қамтылған. Жазғы демалысты ұйымдастыруға бюджеттен 22 млн теңгеден астам қаражат бөлініп, бастауыш сыныптардың 1 230 оқушысы ыстық тамақпен қамтамасыз етілген. Торайғыр ауылындағы «Балдәурен» сауықтыру лагері де есігін айқара ашып, аудандағы 160 оқушы, соның ішінде жөндеу жүріп жатқан мектептердің оқушылары, сондай-ақ көпбалалы, аз қамтылған отбасылардың, жетім және қамқоршысынан айрылған балалар демалады. Ал облыстық деңгейдегі «Жасдәурен» оқу-сауықтыру лагерінде ауданнан 80 оқушы демалады.
Аудандық білім беру бөлімінің әдіскері Гүлден Хабибуллинованың сөзінше, балалар алдағы уақытта Баянауылдың киелі жерлеріне сапарлайды. Атап айтқанда, Мәшһүр Жүсіп кесенесіне, Қ.Сәтбаев пен С.Торайғыровтың мұражайларына, Жасыбай батыр бейітіне, «Қоңыр әулие» үңгіріне, «Кемпір тас» жартасына танымдық саяхатқа шығады. Одан бөлек, жас жеткіншіктер Астана, Алматы, Қарағанды, Павлодар қалаларына, Абай Құнанбайұлының 180 жылдығына орай Жидебайға қызықты саяхатқа барады.
Павлодар облысы
