Суретті түсірген – автор
Ұлттық статистика бюросының мәліметінше, былтыр елімізде жұмыссыздар саны 448,2 адам болған. Бұл 2023 жылмен салыстырғанда 0,5%-ға көп. Сол тұрғыда мұндай жәрмеңке түлектерге таптырмас мүмкіндік.
– Жәрмеңкеде аудандар мен қалалардан 113 жұмыс беруші 2 мыңнан астам бос жұмыс орнын ұсынды. Жергілікті оқу орындарынан 2 300-ге жуық студент келіп қатысты. Қазірде облыста мұғалім, дәрігер, медбике, құрылысшы мамандықтарына сұраныс артқаны байқалады, – деді Мансап орталығының директоры Арайлым Есімбекова.
Шекара шебіндегі Марқакөл ауданы әкімдігінің өкілдері іс-шараға арнайы келіп, мемлекеттік қызметке қызығушылық білдірген жас мамандарды жаңа ауданға жұмысқа шақырды.
– Қазір жекелеген бөлімдерде, әкім аппаратында, әлеуметтік жұмыспен айналысатын 28 бос жұмыс орны бар. Қызығушылық білдіргендер айтарлықтай көп деп айта алмаймыз, бірақ келіп жатыр. Ауылда жұмыс істеуге ниетті жастарға мүмкіндік көп. «Дипломмен – ауылға!» бағдарламасы арқылы баспана сатып алуға немесе салуға несие, көтерме жәрдемақы беріледі, – деді Марқакөл ауданы әкімі аппараты жалпы бөлімінің басшысы Әсем Болысова.
Сондай-ақ Катонқарағай ауданында салынып жатқан әуежайға да мамандар, атап айтқанда, әуе қозғалысы қызметіне диспетчер, метеорологиялық қызметке синоптиктер, радиотехникалық жабдықтарға қызмет көрсету инженерлері қажет.
– Жұмысқа 21-27 жас аралығындағы жастарды қабылдаймыз. Сондай-ақ тағы бір басты талап – ағылшын тілін білуге тиіс. Егер қызығушылық білдіріп жатқандар болса, «Қазаэронавигация» РМК-ға хабарласуға болады, – дейді қызметкерлермен жұмыс жөніндегі бөлім бастығы Гүлжан Ғадылбекқызы.
Одан бөлек, полиция қызметіне, төтенше жағдайлар департаментіне де мамандар керек. Алыс ауылдарда дәрігерлер, фельдшерлер жетіспейді. Жұмысшы мамандарына да сұраныс жоғары. Әсіресе трактор сынды ауыр техникаларды тізгіндеуге жастар құлықсыз. Жәрмеңке көпшілікке мүмкіндік сыйлап, үміт отын жақты. Жұмыс берушілер мен жұмыс іздегендер нөмір алмасып, тізімделіп, көптеп тіркеліп жатты.
Шығыс Қазақстан облысы
