Суретті түсірген – Жангелді ӘБДІҒАЛЫМ
Облысымызда мемлекеттік жалпы білім беретін мектептер саны – 402. Оның 231-і – ауылдық жерде орналасқан. Ал жалпы оқушылар саны – 172 425. Оның 40 753-і ауылдық мектептерде білім алады. Ауылдық білім ошақтарының 160-ы шағын жинақталған мектептер қатарында. Осы орайда өскелең ұрпақты оқыту, тәрбиелеу және дамыту үшін қолайлы және қауіпсіз жағдайлар жасау – маңызды. Оқушы орындарының тапшылығы, апатты және үшауысымды мектептердің мәселесін шешу – күн тәртібінде тұр.
Осы орайда Қарағанды қаласында, Бұқар жырау және Шет аудандарында 8 600 оқу орнына арналған 9 мектеп ашылды. Новостройка ауылында 150 орындық жаңа мектеп апаттық ғимараттың орнына салынған. Балаларға заманауи және кең сынып бөлмелерінде оқуға мүмкіндік беріліп, мектептерді материалдық-техникалық жарақтандыру да жаңартылған.
Жалпы, Қарағанды облысындағы «Келешек мектептері» ұлттық жобасы бойынша 2025 жылға дейін 12 500 орындық 18 заманауи мектептің құрылысы жоспарланған болатын. Оның ішінде биыл 10-ы Қарағанды, Балқаш, Бұқар жырау және Шет аудандарында тапсырылуы тиіс. Қыркүйек айында Бұқар жырау ауданының Новостройка ауылында апатты жағдайдың орнына салынып жатқан 150 орындық мектеп пайдалануға беріледі. Сонымен қатар бүгінгі таңда мектептер базасы жаңғыртылып жатыр. Биыл 15 ғимаратқа күрделі жөндеу жұмыстарын жүргізу жоспарланып отыр. Оқу жабдықтары да жаңартылған. Өткен жылы физика, химия, биология, STEM пәндерін оқытуға арналған 72 заманауи кабинет сатып алынды. Биыл тағы 65 жоспарланған.
– «Ауылдық жерлерде тірек мектептердің әлеуетін дамыту» жобасы бойынша «Қазақстан халқына» қоры 8 мектепті жаңғыртқан. Биыл тағы үш жоспар бар. Қала мен ауыл арасындағы алшақтықты азайту үшін «Репетитор», «Цифрлық мұғалім», «Табыс формуласы», «Мың мектеп» жобалары іске асырылу үстінде. Мектептерде барлық бастауыш сынып оқушылары тегін ыстық тамақ алады. Бұл – 75 мыңнан астам бала. Сондай-ақ жалпыға бірдей білім қорының есебінен әлеуметтік осал отбасылардан шыққан 6 мыңға жуық бала тегін түскі ас ішеді. Өткен жылы облыста 27 жаңа мектеп автобусы сатып алынды. Биыл да жаңарту жалғасады, – дейді Гүлбақыт Жүнісова.
Жалпы, аталған мектептердің жабдықтары мен құрылыс материалдары жоғары талаптарға сәйкес таңдалып алынған. Президенттің мега жобасын сапалы іске асыруда спортзалдардың саны басқа мектептерден әлдеқайда артық. Мектептердің дизайны да ерекше, тіпті бастауыш пен ересек сыныптардың бөлек блоктарда оқуы секілді мәселелер де жіті қарастырылған. Шалғайдағы ауылдардың өзінде жайлы мектептердің бой көтеретіні ауыл балалары үшін үлкен олжа әрі қуаныш болғалы тұр.
– Қазіргі таңда білім ошақтарының құрылыс жұмыстары кестеге сай жүріп жатыр. Мерзімі мен сапасын ерекше бақылауда ұстап отырмыз. Жаңа мектептер жеті түрлі талапқа сай 300, 600, 900, 1200, 1500, 2000 және 2500 орындық болып, ауылда, қалада да жаңа бірыңғай стандарт негізінде салынады. Бастауыш және жоғары сынып оқушылары мектепте бөлек блоктарда оқиды. Әр блокта оқу кабинеттері, дәретханалар, спорт залдары бар. Балалар үшін бейнебақылау, дыбыстық хабарлау және басқа да күшейтілген қауіпсіздік шараларын орнату көзделіп отыр. Заман талабына сай толықтай жабдықталады, – дейді облыстың құрылыс, сәулет және қала құрылысы басқармасы басшысының орынбасары Абылай Смағұлов.
Осылайша, «Келешек мектептері» ұлттық жобасын орындау Ұлттық қор қаражаты есебінен жүзеге асырылып жатқандықтан, бұл жоба үш ауысымдық және апаттық мектептерді жоюға толығымен мүмкіндік береді. Қарағанды облысы бойынша «Келешек мектептері» ұлттық жобасы аясында 2026 жылға дейін 12 500 оқушыға 18 мектеп салып, пайдалануға беру жоспарланған. Қаржыландырудың жалпы көлемі 87,4 млрд теңгені құрайды.
Президенттің тікелей тапсырмасы бойынша жүзеге асқан «Келешек мектептері» жобасы аясында Қарағандыда екі мектеп ашылды. Оның бірі – №19 мектеп. Бүгінде білім ошағы оқушылар арасындағы орын тапшылығын жойып, сапалы білім беріп жатыр.
Бүгінде мектеп ғимараты – облыс мектептері арасындағы ең үлкені. Мұнда бәрі сарапталып, ойластырылған. Үлкен аумаққа қоса балаларға ыңғайлы болу үшін қойылған периметрлік кіреберістер, бастауыш сыныптар мен аға буынға арналған жеке кіреберістер де бар. Мектеп ауласында ойын, воркаут, футбол және баскетбол алаңдары, хоккей корты, жүгіру алаңы да бар. Ал көгалдандыруға арналған ағаштар қоңыржай белдеулік климатты ескере таңдалып алынған. Қазіргі таңда жаңа білім ошағында сол ауданға жақын «Трилистник», «Arena Park», «Жаңа орталық», «Атамекен», «Комфортный дом», «Сапфир», «Байсанат», «Zaman», «Амадина», «Onix» және «Мерей» тұрғынүй кешендерінде тұратын оқушылар білім алып жатыр. Жалпы ауданы 10 мың шаршы шақырымнан асатын №19 мектепте оқушылар үшін барлық жағдай жасалған.
Қарағанды облысы
