Осы мерейлі датаға орай Астана Халықаралық университетінің (AIU) ұйымдастыруымен халықаралық ғылыми-тәжірибелік конференция өтті. Еліміздің қылмыстық және әкімшілік заңнама саласындағы негізгі мәселелер мен жетістіктер талқыланған іс-шараға мемлекеттік органдардың, ғылыми және құқық қорғау қоғамдастықтарының өкілдері, сондай-ақ Ресей Федерациясынан келген қонақтар қатысты.
Жиынды ашып, жүргізген университет президенті, профессор Серік Ирсалиев конференцияны өткізуге себеп болып отырған төрт кодекс еліміздің қазіргі құқықтық жүйесі мен қылмыстық іс жүргізу саясатын қалыптастыруда маңызды рөл атқарғанын тілге тиек етті. Оның айтуынша, Президент Қасым-Жомарт Тоқаевтың бастамасымен жүзеге асып жатқан «Заң мен тәртіп» қағидатының басты тірегі – ең алдымен заң үстемдігінің қамтамасыз етілуі. Осы орайда құқық саласын реттейтін кодекстердің алар орны ерекше.
Конференция барысында Конституциялық соттың төрағасы Эльвира Әзімова, Орталық сайлау комиссиясының төрағасы Нұрлан Әбдіров, Сенаттағы Конституциялық заңнама, сот жүйесі және құқық қорғау органдары комитетінің төрағасы Евгений Больгерт, Президент жанындағы Адам құқықтары жөніндегі комиссияның төрағасы Игорь Рогов, Әділет вице-министрі Лаура Мерсалимова, Бас прокуратураның заңды күшіне енген үкімдердің заңдылығын және олардың орындалуын қадағалау қызметінің басшысы Мұрат Ахметов, Е.Бөкетов атындағы Қарағанды университетінің ректоры Нұрлан Дулатбеков және басқа да мемлекет, ғылым және білім беру саласының көрнекті өкілдері сөз сөйледі.
Атап айтқанда, конференцияға қатысушылар кейінгі 10 жылдағы қылмыстық және әкімшілік-құқықтық нормаларды қолдану тәжірибесін талдап, аспектілерді анықтау мен оларды реформалау бойынша ұсыныстарды талқылады. Құқық қорғау қызметінің тиімділігі, қылмыстық атқару жүйесін жаңғырту, отандық заңнама мен халықаралық стандарттар арасындағы байланыс, жаңа жағдайлардағы әкімшілік жауапкершілік, заңнаманы жетілдіру мақсатында заң ғылымы мен тәжірибенің өзара әрекеттесуі сынды өзекті мәселелер әңгіме арқауына айналды.
Кіріспе бөлімнен кейін еліміздің еңбек сіңірген қайраткері, заң ғылымдарының докторы, профессор Исидор Борчашвилидің екі жаңа монографиясының тұсауы кесілді. «Іс-әрекеттің қылмыстылығын жоятын мән-жайлар» және «Отбасына және кәмелетке толмағандарға қарсы қылмыстық құқық бұзушылықтар: құқық, теория және практика» деп аталатын бұл жаңа еңбектерді мамандар еліміздің құқық қолдану саласына қосылған тың дүние деп бағасын берді. Жиын барысында пікір білдірген әріптестерінің бірі, Астана халықаралық университеті Құқық жоғары мектебі деканының орынбасары Жанат Сейілханов бұл монографиялар құқық қолдану және құқық қорғау органдарының қызметкерлері үшін жолсілтеуші ғылыми туынды екенін айтты.
– «Іс-әрекеттің қылмыстылығын жоятын мән-жайлар» деп аталатын бірінші монография Қылмыстық кодекстің Жалпы бөлімі бойынша жазылған. Бұл тақырып – Қылмыстық кодекстегі жеке бір ауқымды институттың бірі. Ал екінші монографиясы Қылмыстық кодекстің Ерекше бөлімінің екінші тарауы бойынша дайындалған. Бұл жерде отбасына және кәмелетке толмағандарға қарсы қылмыстық құқық бұзушылықтар туралы теориялық және тәжірибелік ерекшеліктері берілген, – деді ол.
Конференцияға қатысқан Ресей Федерациясының заңгер ғалымдары өз еліндегі қылмыстық және әкімшілік заңнаманы реформалау тәжірибесімен бөлісіп, екі елдің құқықтық жүйесінің дамуындағы ұқсас және әртүрлі векторларды атап өтті.
Іс-шара қорытындысы бойынша қатысушылардың сөздері мен баяндамалары негізінде ұсыныстар қабылданды. Оның түпкілікті нұсқасы заң шығару мен құқық қолдану саласында пайдалану үшін мемлекеттік органдарға, ғылыми орталықтарға және басқа да мүдделі ұйымдарға жіберілмек.
