Суретті түсірген – Ерлан ОМАР, «EQ»
Ұлытау ұлттық тарихи-мәдени және табиғи музей-қорығына қойылған әрбір жәдігер, әрбір құжат – тарихтың тірі куәсіндей. Музей қабырғасындағы үнсіз жәдігерлер бабалар дауысы болып естіледі: бірінде көне дәуір тынысы, бірінде жорық көрген жауынгердің жүзі, енді бірінде Хан кеңесінің үні бар.
Ұлытау музейіне аяқ басқан сәттен-ақ мекемедегі жұмыстың жүйелі, мазмұнды екені бірден байқалды. Музейдің көрнекі құрылымы, экспозициялардың реті, тақырыптық мазмұны – барлығы да кәсіби шеберлік пен жауапкершіліктің нәтижесі. Музей-қорығының басшысы Әлібек Күзербаев мұражайдың заманауи форматта дамып, жас ұрпаққа қызықты әрі тартымды дүниелерді ұсынуға бағыт алып отырғанын атап өтті. Музейдің ғылыми қызметкерлері мен экскурсия жетекшілері Азат Сабыржан мен Айболат Рахмания әрбір жәдігер туралы тарихи дерек айтып қана қоймай, тыңдаушыны сол дәуірге жетелейтіндей әсермен әңгімелейді.
Ұлытаудың киелі орындары – ежелгі қазақ даласының рухын бойына сіңірген Жошы хан кесенесі, Алаша хан мазары, Едіге батырдың ескерткіші, Домбауыл мен Кетбұға бабаға қатысты аңызға толы әңгіме тарихи сананы сілкінтпей қоймайды. Әр төбе мен жота, әр тас пен өзен – ел шежіресінің бір тарауы.
Жалпы, кез келген музей ұжымын нағыз рухани майданның сарбаздары деуге болады. Олардың еңбегі көзге көрінбесе де үлкен мәнге ие. Мәдени мұраға деген ұқыпты көзқарас, жас ұрпақтың тарихи санасын ояту жолындағы қажырлы еңбектері – ұлт тарихы үшін аса құнды қызмет.
Жанат БИСЕНБАЕВА,
Phd, қауымдастырылған профессор
