Жинақ үш бөлімнен тұрады. Біріншісі – «Көңілімнің бәйшешегі», екіншісі – «Тамырым – туған жерімде», үшіншісі – «Жерұйығым – Отаным» деп аталады. Осы үш бөлімге қалам иесінің қоғам мен уақыт, ұлт пен рух, тіл мен діл, достық пен махаббат туралы өлеңдері мен толғаулары және туған ауылын көркейтуге өмірін арнаған еңбек адамы жайындағы деректі дастаны енген.
Бұған дейін бірнеше жыр жинағы шыққан ақын өлеңдерінде басы артық сөз жоқ. Ұйқасы шымыр. Бояуды да көп жақпайды. Бәрі де мөлшермен. Оны кітаптың алғашқы бетіндегі «Бозқараған» өлеңінен-ақ байқайсыз. Бұған автор Мұқағали Мақатаевтың «Бозқараған» өлеңінің алғашқы екі шумағын эпиграф ретінде алыпты. Бірақ Нұрлан оны басқаша жырлаған.
«Әдемілік көрмей кеп көптен бері,
Тар қапаста талай күн өткен еді.
Сезім шіркін, бүр жарып жанарымда,
Жапырағы жанымның көктей берді»,
деген өлең жолдарынан ақын жүргінің лүпілі естіледі.
Жинақтағы көлемді дүниенің бірі – «Әулетбасы» атты деректі дастан. Бұған бір әулеттің тірегі Сүлеймен Көшкінұлының өмір жолы арқау болған. Мұнда автор кейіпкері арқылы өткен ғасырда халқымыздың басынан өткен оқиғаларды астастыра бейнелеген. Дастан жинақы жазылған. Жүрдек оқылады.
Қысқасы, ақынның жаңа жыр жинағы өз оқырмандарының жүрегіне жол табады деген сенімдеміз.
Қайсар Құсайын
