Жаттығу барысында жанкештілікпен тер төгетін саңлақ таяуда АҚШ асып, жаһанның кіл мықты спортшыларымен бірге оқу-жаттығу жиынын өткізді. Колорадо штатындағы Денвер қаласында орналасқан Олимпиадалық базада ұйымдастырылған оқу-жаттығу жиынында классикалық күрес шеберлерімен тәжірибе алмасқан оғлан халықаралық оқу-жаттығу жиынының пайдасы зор болғанына сенімді.
«Үш аптаға созылған жиын барысында екі кезеңде шама-шарқымызды байқап көрдік. Мұнда төрткүл дүниенің жүзден астам мықтысы физикалық дайындығын пысықтап, өз мүмкіндігін зерделеді. Тәжірибе алмасуға келген сайыпқырандардың қатарында сары құрлық пен кәрі құрлықтың кіл мықтылары, Олимпиада, әлем чемпиондары да болды. Олармен бірге жаттығудың жөні бөлек», дейді ол.
Есту қабілеті зақымданған спортшылар арасында байрақты бәсекелерде ел намысын абыроймен қорғап жүрген Нұржан шартараптың кіл мықтылары бас қосқан жиында кәсіби шеберлігін шыңдап қана қоймай, өзіне қажетті дүниелерді көкейге түйгеніне талас жоқ.
«Мықтылармен жаттыққан сайын шеберлігің шыңдала түседі. Оқу-жаттығу жиынын ұйымдастырған азаматтарға, бапкерлерге алғыстан басқа айтарым жоқ. Басты мақсатымыз – ірі жарыстарда атой салып, сенім артып отырған барша қауымды, жанкүйерлерді қуанту. Қолдан келгенше көк байрақты биікте желбіретуге күш саламыз», дейді спортшы.
Нұржан Бразилиядағы сурдлимпиялық ойындардан бөлек, 2023 жылы Бішкекте өткен әлем чемпионатында топ жарған. Сонымен қатар Азия ойындарында да жеңістің биік тұғырынан көрініп, бірнеше халықаралық турнирде жүлдегер атанған. Алдағы уақытта Сурдлимпиада ойындарында топ жаруға ниетті.
Жамбыл облысы
