Туған елінің жоғын жоқтап, рухын көтеру жолында тер төкті. Қаламынан туған алғашқы шығармаларынан бастап кейінгі туындыларына дейін өзекті тақырыпты көтерді. Ұлт мінезін, әлеумет мәселелерін терең толғаған еңбектері бірнеше буынның рухани жан азығы ретінде сана-сезіміне қозғау салды. Ұлт руханиятын жетілдірді.
Әкім Тарази алғашқы еңбегі «Құйрықты жұлдыз» повесінің өзімен-ақ әдебиет ауылына именбей енгенін оқырман жақсы біледі. Одан беріде тынымсыз еңбек пен асқан қарым-қабілет арқасында «Үлкен ауыл» (1968), «Асу-асу» (1970), «Көкжиек» (1980), «Басынан Қаратаудың» (1984) повесть-әңгімелері ұлт әдебиетінің қоржынын еселей түсті. «Бұлтқа салған ұясын» атты тұңғыш романы жоғары бағаланып, оқырманның көңілінен шықты. «Тасжарған», «Кен», «Жаза», «Шер», «Махаббат жыры», «Қиянат» сынды романдары қазақ әдебиетінің шоқтықты шығармалары қатарына қосылды. Алтын қорда сақталған «Тұлпардың ізі», «Арман атаман», «Қараш-қараш», «Мұстафа Шоқай» сынды кинотуынды сценарийлерінің авторы Әкім Таразидің жүріп өткен жолы – ұлттың көшелі мұратын түгендеген қыруар еңбек пен өтелген борыштың жолы.
Дүниеде әдебиеттің даңғыл бозы, ұлтының ұлықты ұлы атану – таңдаулы тұлғалардың еншісіне жазылған бақ. Ылдидан шапса төске озған отаншыл тұлға қаламымен ғана емес, болмыс-бітімімен қоғамдық жиындарда да қайраткерлік қырынан танылғанын білеміз. Кеңес жүйесін сілкіп алған Желтоқсанда да билікті мысымен жасқаған тұлғаның рухы пейіште шалқысын.
«Egemen Qazaqstan» қаламгерлері
