Бұл – «Disney»-дің қазақ тілінде «сөйлеткен» төртінші фильмі. Фильмдерді түрлі елдерге бейімдеп, дубляждау – «Disney» компаниясында бұрыннан қалыптасқан үрдіс. «Disney» жыл сайын әр фильмнің түрлі тілдердегі 40-қа жуық нұсқасын дайындайды. «Қазақ тілі» қоғамының ұйытқы болуымен былтырдан бастап ірі халықаралық студиялар әлемдік премьераларын ұлтымыздың тілінде ұсына бастады. Осы бастама аясында «Disney» студиясы 2024 жылы «Ойжұмбақ 2», «Моана 2», «Муфаса. Арыстан патша» деп аталатын үш фильмін қазақ тіліне аударып, дубляж жұмысын қаржыландырды. Енді көрерменге «Ақшақар» туындысы ұсынылып отыр. «Disney» студиясының «Ақшақар» фильмі – 1937 жылғы анимациялық фильмнің бейімделуі. Сиқыр мен музыкаға құрылған шытырман оқиғада 7 ергежейлі кейіпкер – Ақылды, Жұбаншақ, Күлегеш, Ұялшақ, Түшкiршек, Ұйқышыл, Аңқау экранға қайта оралады.
Көрсетілімге дубляж актерлерінің толық құрамы, танымал тұлғалар тұтас қатысты. Олар: мюзикл актрисасы Жарқынай Ханайым, әнші, актриса Айгүл Иманбаева, әнші Жұлдыз Уәлихан, әнші Еркеш Хасан, актер Қайрат Әділгерей, кинорежиссер Ақан Сатаев. Қазақ тіліндегі дубляж режиссері – Шах-Мұрат Ордабаев, қазақ тіліндегі әндердің музыкалық жетекшісі – Анель Сіргебаева.
Бұған дейін «Моана 2»-нің қазақша нұсқасы бокс-офистердің 12,36% үлесін қамтыған еді. Кассалық табыс үлесі 12 күнде 151 000 000 теңгеден асып, қазақшаға аударылған анимациялық фильмдер арасында ең табысты туынды ретінде рекорд орнатты. «Disney» мен «Pixar» студиясының «Ойжұмбақ 2» фильмі алғашқы 4 күнде 40 000 000 теңгеден астам қаражат жинап, бұған дейін көрсетілген туындылар арасында рекорд орнатқан болатын. «Муфаса. Арыстан патша» көркем фильмін қазақ және орыс тілдерінде көруге 1,1 миллион көрермен келген.
Көрсетілімге елімізге танымал тұлғалар, қоғам қайраткерлері, кәсіпкерлер мен депутаттар, дубляж актерлері мен блогерлер, БАҚ өкілдері қатысты.
АЛМАТЫ
