VIVA, Мария!

Наурыз мерекесі қар­­саңында облыс тұр­ғындары Естай атындағы мәдениет сарайында әлемдік опера жұлдызы Мария Мудряк пен «Астана балет» театры симфониялық оркестрінің концертін тамашалады.

Бағдарламада италиялық опера, аустриялық опереттаның романтика және испаниялық сарсуэла жанрындағы үздік шығармалар орындалды.

– Маған өзім туып-өскен Павлодарымда концерт беруге мүмкіндік берілгеніне өте қуаныштымын. Сондай-ақ «Астана балет» театрына өз­де­рінің симфониялық оркестрі­мен бірге өнер көрсетуге тағы бір мүмкіндік бергеніне ал­ғысым­ды білдіремін. Бүгін сахнада ең әуелі өз репертуарымдағы шы­ғармаларды орындадым. Моцарт пен Вердиден және мерекелік көңіл күй сыйлайтын, жеңіл ауандағы туындылардан, мәселен, Ардити, Легардың ком­позициялары бар. Бұл операны сүйетін қауымға ғана емес, мұндай концертке алғаш рет келіп отырған көрермендерге де ұнады деген ойдамын, – деді Мария Мудряк.

Өнер иесі тыңдармандарды әлдебір санатқа бөлу деген ұғымнан ада болу керек екенін жеткізді. Бір адам ба, әлде мың адам ба, бастысы кез келген аудиторияда барынша тамаша етіп өнер көрсетсе, мақсатының орындалғаны деп біледі екен. Әрі концертте мейлінше көбірек ән шырқағанды жаны қалайтынын, концерт репертуары дауыс мәнерінің қалайша дамитынымен тығыз байланысты екенін атап өтті.

«Мен дауысымды үнемі бақылап отырамын, соған орай қай партияның қай туындыдан кейін орындалатынын концерт барысында жүре жоспарлаймын. Мұндай партиялардың саны өте көп», деді әнші.

Әлемдік мамандар Ма­рияның даусын қазіргі заман­ның ең әдемі және бірегей дауыстарының бірі деп таниды. Бірегей дауыс иесі опера­ әншілерінің әлемдік ТОП-10-дығына енген. Сондықтан мерекелік концертті Павлодар облысының ғана емес, еліміздің де жарқын мәдени оқиғасы болғанын айтар едік.

Айтып өтейік, Мария Мудряк ән айтуды үш жасы­нан бастаған. 5 жасында Павлодар қаласының №1 музыкалық мектебіне оқуға түседі. Ал 13 жасында Джузеппе Вер­ди атындағы Милан мем­лекет­тік консерваториясына түсіп, «Ла Скала» театрының қойы­лымдарына қатысты.

Павлодар облысы