Жалпы алғанда биыл 659,9 мың гектар алқапқа ауыл шаруашылығы дақылдарын орналастыру жоспарланған. Бұл көрсеткіш өткен жылмен салыстырғанда 33,2 мың гектарға артқан. Сондай-ақ көктемгі дала жұмыстарын қаржыландыру үшін «Агронесиелік корпорация» арқылы шаруаларға 8 млрд теңге көлемінде 5 пайызбен несие берілмек.
«Осы жылы 400-ден астам ауыл шаруашылығы техникасын сатып алып, жаңару жоспарын 6,5 пайызға жеткізу көзделіп отыр. 2025 жылы ауыл шаруашылығы саласын қолдауға 39,6 млрд теңге бөлінді. Бұл қаржы есебінен 16 мыңнан аса ауыл шаруашылығы тауар өндірушісіне қолдау көрсетіледі. Нәтижесінде өсімдік шаруашылығында 325,1 млрд. теңгенің өнімі өндіріледі деп күтілуде», дейді облыстық ауыл шаруашылығы басқармасы басшысының міндетін атқарушы Әбдірәсіл Желеубаев.
Өңір шаруаларының алаңсыз жұмыс істеуі үшін барлық жағдай қарастырылып жатыр. Үкімет тарапынан 20 мың тонна дизель отыны бөлінген. Сондай-ақ осы жылы біршама алқапқа 83,1 мың тонна минералды тыңайтқыш енгізу жоспарланған. Ал шаруаларға арзандатылған бағамен ұсынылатын жанар-жағармайдың кедергісіз берілуін өңір басшысы Ербол Қарашөкеев жеке бақылауына алды.
