Көпшіліктің есінде қалған бұл жекпе-жекке Бекзаттың алаңға жарақатпен шыққанын біреу білсе, біреу білмеуі мүмкін. Және де оны бірден тым мықты қарсыласқа қарсы қойды. Умар – даңқты Нурмагомедовтер әулетінің мүшесі. Сол күнге дейін ол 16 кездесуінің барлығында жеңіске жетті. UFC-ге келген бетте төрт қарсыласын сұлатып салды. Жуырда ғана авар ұлтының өкілі әлемдегі ең белді промоушеннің чемпиондық белбеуі үшін грузиялық Мераб Двалишвилимен жекпе-жекке шығуы да оның қандай деңгейдегі тұлға екенін аңғартса керек. Бірақ Алмахан одан еш қаймыққан жоқ. Атағы жер жарған Хабибтің інісімен тең дәрежеде айқасып, өзінің әлеуеті зор спортшы екенін байқатты. Десек те жеңіс Умардың уысында кетті.
Содан бері бір жылға жуық уақыт өтсе де, Бекзат Алмаханды айқас алаңынан көре алмадық. Сөйтсек, жарақатымен алысып әлек болып жүрген екен. Ұзақ уақыт бойы ем-дом қабылдап, енді ғана қатарға қосылды. Күні кеше ғана Бекзаттың қайта октагонға шығатыны белгілі болды. Ол 11 мамырда Канаданың Монреаль қаласында өтетін UFC 315 турнирінде өнер көрсетеді. Қарсыласы – канадалық Брэд «Супермен» Катона.
33 жастағы Брэд Канадада дүниеге келгенімен, қазіргі кезде Ирландияда тұрып жатыр. Ол жастайынан күрес, бокс және бразилиялық джиу-джитсумен шұғылданды. Аралас жекпе-жектегі мансабын 2014 жылы бастады. Сол аралықта 20 кездесу өткізіп, 16 рет жеңіске жетті. Дублиндегі «SBG Ireland» залында атышулы Конор Макгрегормен бір залда жаттығатын «Супермен» «The Ultimate Fighter» турнирінде екі мәрте топ жарып, UFC-ге қабылданды. 2021 жылғы 11 наурызда Бахрейннің BRAVE промоушенінің чемпионы атанды.
Брэд Катона талай дүлей күш иелерімен күш сынасты. 2019 жылы Мераб Двалишвилимен айқасқанының өзі неге тұрады. UFC-дің болашақ чемпионынан ұпай санымен ғана ұтылды. 2021 жылы Үйеңкі жапырақтар елінің өкілі Алматыда ұйымдастырылған BRAVE турнирінде ресейлік Байр Штепинді сабап тастағанын көзіміз көрді. Былтыр «Супермен» үш рет октагонға шықты. Луисвиллде Джесси Батлерді жеңсе, Торонто мен Лас-Вегаста Гаррет Армфилд пен Жеан Мацумотаға есе жіберді. Бұл бәсекелердің барлығы да аяғына дейін созылып, қорытынды шешімді төрешілер шығарды. Міне, енді Катона қазақтың ұлы Бекзат Алмаханға қарсы шығады.
