Біраз жылдан бері айшықты өнерімен өз жанкүйерлерін қуантып жүрген аса жеңіл салмақтағы Асу «Зұлпықар» Алмабаев сын сағатта білгенінен жаңылды. Лас-Вегаста 31 жастағы қазақ файтері португалиялық Манель «Жұлдызды жігіт» Капемен күш сынасты. Капе – көпті көрген көкжал. Оның осы спорт түрімен айналысып жүргеніне 13 жылға жуықтады. Кезінде KOC пен Rizin промоушендерінің алтын белбеуін иеленген Анголаның тумасы барлығы 28 жекпе-жек өткізіп, соның 21-інде жеңіске жетті. 18 кездесуін мерзімінен бұрын аяқтады. Осыдан үш жылдан аса уақыт бұрын, дәл осы шаһарда біздің Жалғас Жұмағұловты нокаутпен жеңді.
Қос саңлақтың айқасында Капенің басымдығы анық байқалды. Үшінші раунда ол Алмабаевтың көзін шұқып алды. Бірақ төреші «ештеңе болған жоқ» дегендей сыңай танытып, жекпе-жекті тоқтатқан жоқ. Пиреней түбегінен келген тарлан осы сәтті оңтайлы пайдаланып, қандасымызды төмпештей бастады. Араға төреші түсіп, бәсекені тоқтатты. Сөйтіп, «Жұлдызды жігіт» жеңіске жетті. Қатарынан 17 кездесуді өз пайдасына шешіп, сегіз жыл бойы ешкімге дес бермеген Асу бұл жолы жеңілгенін мойындады. Егер «Зұлпықар» осы бәсекеде басымдық танытқанда, чемпиондық атақ үшін айқасуы әбден мүмкін еді. Өкінішке қарай, Алмабаевқа ондай бақ бұйырмады.
