Жоғарыдағы жағдайдан кейін UFC басшылығы рейтингте 9-орында тұрған Стив Эрцегтің орнына дереу басқа спортшыны іздеді. Көп кешікпей Асудың қарсыласы ретінде Аллан Насиментоның есімі аталды. «Таза сүйек» деген бүркеншік атпен танылған 33 жастағы Бразилияның өкілі 2011 жылдан бері аралас жекпе-жекті серік етеді. Бірақ кейіннен Насиментоның басқа біреумен айқасатыны белгілі болды. Қандасымыз енді португалиялық Манэл Капемен күш сынасады. Манэл Анголада туып, кейіннен Португалияға қоныс аударған. 31 жастағы файтер аралас жекпе-жектегі тұсаукесер кездесуін 2012 жылдың көктемінде өткізді. Барлығы 27 рет айқас алаңына шығып, 20 рет жеңіске жетті. 17 бәсекеде айқын басымдық танытты. Бүркеншек есімі – «Starboy» («Жұлдызды жігіт»). 2019 жылы Пиреней түбегінен келген көкжал Сайтамадағы Rizin 20 турнирінде Кай Асакурадан айласын асырып, сол промушеннің чемпионы атанды. 2021 жылы UFC-ге қабылданды. Әлемдегі ең белді ұйымдағы алғашқы екі кездесуінде Алешандро Пантожа мен Матеус Николаудан ұтылды. Одан кейін Оде Осборн, Жалғас Жұмағұлов, Дэвид Дворак, Фелипе Дос Сантосқа сан соқтырды. Былтыр екі жекпе-жек өткізді. Жазда Мұхаммад Мокаевтан жеңілсе, қыста Бруно Густаво да Силваны есінен тандырды.
Жамбыл облысы Сарысу ауданында дүниеге келген Асу Алмабаев 25 қаңтарда 31 жасқа толды. 2013 жылдан бері кәсіпқойлар арасында бақ сынап жүр. Рекорды – 23 жекпе-жек, 21 жеңіс, 12 нокаут, 2 жеңіліс. Асу үшін 2017 жыл сәтсіз болды. Қазақ файтері Тагир Ұланбеков пен Мехман Мәмедовтен ұтылды. Сәтсіздіктен сабақ алған Алмабаев қатарынан 17 бәсекеде басымдық танытты. 2019 жылы М-1 Global промоушенінің уақытша чемпионы атанды.
Ұзақ уақыт бойы АСВ, Алаш Прайд, Tech-Krep, Fight Nights, Найза, М-1 Global, Brave секілді ұйымдарда күш сынасып, біраз тәжірибе жинақтаған Асу 2023 жылғы 5 тамызда UFC-дегі тұсаукесер кездесуін өткізді. Нэшвилде ямайкалық Ода Осборнды «қылқындыру» тәсілімен ұтты. Былтыр америкалық Карлос Вергара, Хосе Джонсонды, бразилиялық Матеус Николауды төрешілердің шешімімен жеңді. Осы табыстарының арқасында рейтингте 8-орынға көтерілді.
Қазірде мамандар Алмабаевтың әлеуетін жоғары бағалап отыр. Бұл салмақтың чемпионы – Алешандре Пантожа (Бразилия). Брэндон Ройвал (АҚШ), Брэндон Морено (Мексика), Әмір Албази (Иран), Кай Кара-Франс (Жаңа Зеландия), Тацуро Таира (Жапония), Манель Капе (Ангола), Алекс Перес (АҚШ) сынды саңлақтар рейтингте біздің жігіттен жоғары тұр. Десек те Асудың алар асулары әлі алда. Осы жекпе-жекте жеңіске жетсе тағы бірнеше сатыға биіктейді. Жеңісті жолы жалғасын тапса, чемпиондық тәжге де таласатын болады.
