Бұған дейін Маңғыстаудың Мұнайлы ауданында, Тобыл өңіріндегі Рудный қаласында Бейімбет Майлин, Төлен Әбдік сынды әдебиет алыптарының шығармашылығына арналған төрт бірдей байқау өткізген кәсіпкер Рудный қаласында өткен «Әбіш оқуларын» қорытындылап, жеңімпаз оқушыларға бағалы сыйлықтар табыс етті.
Жас оқырмандар жарысына Қостанай, Рудный қалалық мектептерінің 8-11 сынып оқушылары қатысты. Барлығы – 89 бала байқаудың бірінші кезеңінде халық жазушысы Әбіш Кекілбайұлының шығармалары бойынша тест сауалдарына жауап берді. Одан іріктеліп шыққан 35 бала жазушының «Бәсеке» повесінің мазмұнын талдап, тарқатып эссе жазып шықты.
Байқау жеңімпаздары Рудныйдағы оқушылар сарайында марапатталды. Жиын барысында аталған құрылыс компаниясының басшысы өздері өткізіп отырған «QC Read» жобасы аясындағы білім жарысының мән-маңызы жөнінде айтты.
«Әдетте бизнес саласында жүрген адамдар спортты, басқа да салаларды қолдап жатады. Көбіне білімді қоғам қалыптастырмай еліміз ілгері баспайтыны ескерілмейтіні бар. Қандай саясат жүргізсеңіз де, қандай қаржылай қолдау жасасаңыз да, білім болмаған жерде қоғам да, адам да дамымайды. Неге дамыған мемлекеттердің азаматтары көп оқиды? Мысалы, Ұлыбританияда адам санына шаққанда бір адам күніне он бет оқиды екен. Сондықтан біздің жобамыз негізінен оқитын жастардың қатары көбейсе екен деген ниеттен туған. Байқауда 89 оқушы бақ сынады. Бұл да жаман емес. Енді Оралхан Бөкейдің шығармашылығын дәріптеуді көздеп, Катонқарағайда оқушылардың жазғы лагерін ұйымдастыруды ойластырып жатырмыз. Мақсат – оқитын балалардың санын көбейту. Оқуды әдетке айналдыру. Оқитын бала лудомания, нашақорлық деген жаман нәрселерден бойын аулақ ұстайды. Жүзден жүйрік шыққан жас оқырман бағалы сыйлықтарға ие болады. Алдағы уақытта сыйлық қорын ұлғайтып, қаржылай сыйлықтар тағайындауды жөн көріп отырмыз», деді Нұралхан Әмірханұлы.
Компания басшысы 89 баланың ішінен озып шыққан Жітіқара мектебінің оқушысы Асылзада Берекетоваға, Қостанай қаласынан келген Диляра Бағланқызына, рудныйлық Кәусар Қасымбек, Айдана Нағметова, Назкен Күзібаеваларға «Айфон», «Айпад» тәрізді бағалы сыйлықтар табыс етті.
Нұралхан Әмірханұлы алдағы уақытта Міржақып Дулатұлының 140 жылдығына арналған жас оқырмандар байқауын ұйымдастыруды көздеп отыр. Байқау жеңімпаздары Алаш көсемдерінің кіндік қаны тамған Торғай өңірін аралап, Ахмет Байтұрсынұлының Сартүбектегі кесенесіне, Бидайықтағы Міржақып Дулатұлының музейі мен кесенесіне соғатын болады.
Қостанай облысы
