Қос кітаптың тұсаукесерін белгілі журналист Құрманәлі Қалмаханұлы жүргізді. Ол автордың ұзақ жылғы қауіпті де жауапты салада атқарған қызметі туралы кеңінен әңгімелеп, арасында деректі фильмдерді көрсетіп отырды. Генерал-лейтенант Абай Тасболатов, қоғам қайраткерлері Әлихан Бәйменов, Ерсұлтан Бектұрғанов, генералдар Әсет Әділхан, Дәулет Салханов, Мұхтар Аюбаев, елге есімі кеңінен таныс Елсияр Қанағатов, Тастанбек Есентаев, Несіп Жүнісбаев сөз алып, бұл жинақтың жастар үшін ерекше екенін, патриоттық тәрбие беруде маңызды екенін атап өтті.
Үш бөлімнен тұратын бұл қос кітапта 1990 жылдардағы қылмысқа қарсы күрес, кепілге алғандарды босату, қарулы қылмыстық топтарды жою, экстремизм мен терроризм актілерін оқшаулау сияқты арнайы жасақтың ерен еңбектері мен ерліктері детектив желісінде баяндалады. Бірінші бөлімдегі «Сыған қызын босату», «Бір өзеннің қос жағасы немесе Рыжий Алмазды ұстау», «Кепілге алынған кәсіпкерді босату», «Жұртты үрейлендірілген «Четыре братья», «Асқар Жамбульский оқиғасы» атты тақырыптарда автордың көзбен көріп, қылмысты өз бөлімінің сарбаздары құрықтаған оқиғалары аса тартымды суреттелген. Ал кітаптың екінші бөліміндегі «Көк сауытты арландар», «Отан үшін отқа түс, күймейсің», «Экстремизмге қарсы күрес», «Ұрланған бала туралы оқиға», «Шұбар» элиталық ауданында болған оқиға» атты жазбалары оқырманның бірден назарын аударып, бір демде оқып шығасыз.
Ал кітаптың үшінші бөлімінде автордың спорттың бір түрі қоян-қолтық ұрысының елімізде қалай дамығаны, «Динамо» спорт қоғамы сайыпқырандарының ел абыройын асқақтатудағы жеңісті жолдары туралы айтылады. «Спорт – мәңгілік серігім» атты мақаласында «адамды жетістікке жеткізетін табандылық пен төзімділік» дейді де, өзімен бірге қызметтес болған әріптестері жөнінде баяндайды.
Оңдасын ЕЛУБАЙ,
журналист
