Сурет: baq.kz
Сенат комитетінің төрағасы Андрей Лукин шекара нысандары құрылысының кешеуілдеу мәселесіне назар аударды. Оның айтуынша, республикалық бюджеттен жыл сайын қаржы бөлінгенімен, көптеген нысандағы жұмыс не тоқтап қалған, не тым баяу жүзеге асып жатыр.
«Біз Солтүстік Қазақстан облысындағы «Ақкөл» шекара бөлімшесі сияқты нысандардың құрылысы тоқтап қалғанын өз көзімізбен көрдік. Мәселенің себебін анықтау әрекетінен ештеңе шықпады, нақты жауап ала алмадық. Сонымен қатар мұндай жағдай шамамен 20 нысанда байқалып отыр, бұл мердігерлерге салмақты сұрақ қоюды талап етеді», деді А.Лукин.
Көлік вице-министрі Сәтжан Аблалиев негізгі мәселелер қаржыландыру мен су тасқыны кезіндегі қиындықтарға байланысты екенін атап өтті. Оның айтуынша, жұмыс кестесін бұзған мердігер ұйымдарға айыппұл салу туралы ескерту жолданған, ал 20 нысан құрылысының бірінші кезеңін 2025 жылы аяқтау жоспарланыпты.
Отырыс барысында бюджет қаржысын мақсатты түрде пайдалануға бақылауды күшейту мәселесі мен тапсырыс берушілер, мердігерлер және қадағалау органдары арасындағы өзара іс-қимылды жақсарту жөніндегі ұсыныстар талқыланды. Сенаторлар құрылыс мерзімін сақтау және екінші кезеңдегі құрылысқа арналған жобалау-сметалық құжаттаманы әзірлеу қажеттігіне ерекше назар аударды. Екінші кезең аясында тағы 30 шекаралық нысан салу жоспарланып отыр.
Кездесуге қатысушылар барлық тараптың міндеттемелерді қатаң орындалуы маңызды екенін және мұндай айрықша жобаларды жүзеге асыруда жауапкершілікті арттыру қажеттігін атап өтті.
