Ептілік пен мергендік сыналатын жамбы ату сайысына 27 мемлекеттен 78 спортшы қатысып жатыр. Спортшылар 11 топқа бөлініп, додаға түсті.
Жамбы атудың мажар стилі бойынша өткен сайыста Франция мергені Рафаэль Малет чемпион атанды. Күміс медаль моңғолиялық Алтынгуях Нэргуйге бұйырса, қола жүлдені Малеттің отандасы Гатэн Бло еншіледі. Ұлттық құрама мүшесі Абзал Тұлыбеков бесінші орынды місе тұтты.
«Мажар стилінің ерекшелігі – спортшы атпен жүйткіп келе жатып, нысанаға көп оқ тигізу керек. Жебе санына шектеу жоқ. Көшпелілер ойындарына ұлттық құрама мүшелері тыңғылықты әзірлік жүргізді. Мажар стилінен медаль бұйырмағаны өкінішті. Жыл басынан бері төрт оқу-жаттығу жиынын өткізіп, әр мергеннің жеке дайындығына көңіл бөліп, тактикалық жоспар бойынша шеберлігін шыңдадық», деді Жамбы атудан Қазақстан ұлттық құрамасының бас бапкері Елдос Бадашев.
Ел құрамасы сапында Айтбек Сарыбай, Ералхан Айкөз, Батыр Бексауыт, Абзал Тұрлыбеков бақ сынайды. Спортшыларымыз бұған дейін әлем, Еуропа чемпионаттарынан жүлделі оралып, мерейімізді тасытқан еді. Мергендеріміз әлі Азия, түрік, қазақ стильдері бойынша тартысқа түседі.
