Ақтауда шенеунік тұтқындалды

АҚТАУ. 12 маусым. Ақтауда қалалық тұрғын үй коммуналдық шаруашылығы бөлім бастығы, соңғы уақытта қала әкімінің орынбасары міндетін уақытша атқарған Сағынғали Амангелдиев қамауға алынды. Бұл туралы egemen.kz тілшісі хабарлады. Уақытша оқшаулау абақтысында отырған шенеунікке қатысты екі қылмыстық іс қозғалған болса, оның біреуі – пара алу айыбы бойынша. «Мемлекеттік қызмет істері және сыбайлас жемқорлыққа қарсы іс-қимыл агенттігінің Маңғыстау облысы бойынша департаменті, 2015 жылдың 8 маусымында Ақтау қаласы әкімінің орынбасары міндетін атқарушы, Ақтау қалалық тұрғын үй коммуналдық шаруашылығы және тұрғын үй инспекциясы бөлімінің басшысы 1969 жылы туған Амангелдиев Сағынғали Қалмұханұлының тұтқындалғандығын және оған қатысты лауазымдық өкілеттіктерді теріс пайдалану фактісі бойынша сотқа дейінгі тергеу амалдарының жүргізіліп жатқандығын растайды. Тергеу амалдары жүргізілуі себепті бұдан басқа ақпарат жария етілмейді», – дейді Маңғыстау облыстық сыбайлас жемқорлыққа қарсы іс-қимыл департаментінің бөлім басшысы Ербол Жұмабай. Гүлайым Шынтемірқызы. Дерек: egemen.kz. Сурет: today.kz.