Отырыста қатысушылар университеттің болашақ дамуы мен ғылыми-зерттеу әлеуетін талқылап, биылғы бюджетті бекітті. Сондай-ақ кеңес мүшелері қаржылық тұрақтылықты қамтамасыз ету, ғылым мен өндірісті біріктіру бойынша нақты міндетті белгіледі.
– Nazarbayev University – еліміздегі ғылым саласында жетекші білім ордасы. Оның зерттеу әлеуетін одан әрі дамытуымыз қажет. Бүгін біз бұған көз жеткізіп отырмыз. Алдағы таңда еліміздегі өңірлік жоғары оқу орындары да біртіндеп ғылыми-зерттеу институттарының үлгісіне көшеді деп ойлаймын. Біз университет пен өндіріс арасындағы ынтымақтастықты күшейткіміз келеді, – деді Саясат Нұрбек.
Жиын аясында қамқоршылық кеңесінің мүшелері геномдық медицина зертханасының жұмысымен танысып, ақылды жүйелер және жасанды интеллект институтының (ISSAI) әзірлемесін көріп, ғалымдармен кездесті.
Университет президентінің міндетін атқарушы директор Адесида өз сөзінде, алдағы таңда ғылыми-зерттеулерге баса назар аударып, ерекше көңіл бөлетінін айтты. «Біздің оқу орны жас ғалымдарды, соның ішінде PhD дәрежесін шетелде алған қазақстандық зерттеушілерді тарту үшін барынша жағдай жасауға күш саламыз», деді ол.
Кездесу соңында университет басшылығы білім беру ресурстарын дамытуды, ғылыми әзірлемелерді коммерцияландыру және ел экономикасына қосатын үлесін арттыруда өнеркәсіптік сектормен серіктестікті нығайтатынын жеткізді.
Бекзат ҚҰЛШАР,
Л.Н.Гумилев атындағы Еуразия ұлттық университетінің студенті
