ҚР Төтенше жағдайлар министрлігінің ресми өкілі Руслан Иманқұловтың сөзінше, Төтенше жағдайлар министрлігінен ешқандай хат жіберілген жоқ, министр мұндай хатқа қол қоймаған.
«Аталмыш хатта жер сілкінісіне қатысты болжам болды. Бұл болжам жөнінде ақпаратты өткен жұмада ҚР Төтенше жағдайлар министрлігіне қарасты Сейсмология институтының директоры Дәулет Сәрсенбаев институтта өткен брифингте таратты, онда осы аптада Алматы қаласы, Алматы және Жетісу облыстарында 3-3,5 баллға дейін жер сілкінісі болжанғаны айтылған, бұл аталған өңірлер үшін қалыпты жағдай. Мұндай жағдайда еш дүрбелең болмауы керек. Халыққа бәрін мәлімдеп отырамыз», деді Руслан Иманқұлов.
Ведомство өкілінің айтуынша, өткен аптада сейсмикалық болжау комиссиясы отырысының қорытындысы кезінде мамандар жер сілкінісіне болжам жасаған.
«Біз бірден сағат 18:30-да брифинг ұйымдастырып, қажетті ақпаратты тараттық. Сондықтан жасыратын ештеңе жоқ. Қандай да бір қажеттілік туса немесе қандай да бір болжам жасалса, қажет ақпаратты дер кезінде жеткіземіз», деп қосты Руслан Иманқұлов.
