Сондай-ақ ол қызметкерлердің сұрақтарына жауап берді. Металлургтердің көпшілігі зиянды өндіріс орнында жұмыс істейтіндіктен, ерте зейнетке шығу мәселесін көтеріп, «қауіпті кесте» ұғымын қайтару қажеттігін атап өтті. Кездесу соңында зауыт қызметкерлері сайлауалды додада сәттілік тілеп, кандидатқа жұмысшылар кәсіподақтары бірлігінің белгісі ретінде касканы табыс етті.
Металлургтермен кездесуден кейін кандидат Мейрам Қажыкен «Адал еңбек KZ» ЖШС-на барды. Бұл компания «Қазақмыс» корпорациясының бастамасымен кәсіпорындарда еңбек жарақатын алған адамдарды жұмысқа орналастыру мақсатында құрылған ұйым. Кездесу барысында үміткер компания басшылығымен және белсенділерімен танысты. Мұнда қызметкерлер ерекше қажеттіліктері бар адамдарды әлеуметтік қорғау мәселесіне ден қойды.
Естеріңізге салсақ, Жезқазған мыс балқыту зауыты 1971 жылы ақпанда пайдалануға берілді. Зауыттың жобалық қуаты – жылына 200 мың тонна катодты мыс өндіреді. Ал «Адал еңбек KZ» ЖШС 2015 жылы Жезқазған қаласында компания кәсіпорындарында еңбек жарақатын алған адамдарды жұмысқа орналастыру мақсатында құрылғанын атап өткен жөн.
