Нұр-Сұлтан қаласы әкімдігі және Ұлттық әскери-патриоттық орталығының қолдауымен, «Жас сарбаз» жасөспірімдер әскери-патриоттық қозғалысының елордалық филиалының ұйымдастыруымен өткен іс-шараға Қорғаныс министрлігінің өкілдері, генералдар, аудан әкімдері және жас сарбаздар қатысты.
Кездесу барысында Тоқтар Әубәкіров ғарыш әлеміне қатысты деректермен бөлісіп, ғарыш әлемін бағындырған сәтіндегі естен кетпес естеліктерін айтып берді. Сондай-ақ ол ғибратқа толы ғұмырында атқарған елеулі жұмыстары туралы тебірене әңгімеледі. Халық қаһарманының қызықты әңгімелері іс-шараға қатысқан жастарды үлкен әсерге бөледі. Кейіннен Тоқтар Әубәкіров жас сарбаздарға қолтаңба беріп, арнайы естелік сыйлықтарын табыстады.
Кездесу барысында Тоқтар Әубәкіровке «Жас сарбаз» қозғалысының тәрбиеленушілері көкейлерінде жүрген сауалдарын қойды. Халық қаһарманы жасөспірімдермен емен-жарқын әңгімелесіп, ғарыш әлеміне қатысты ойларын ортаға салды.
«Біз бұл іс-шараны жасөпірімдер қазақтың дарабоз тұлғасының тағылымға толы өмір жолымен таныссын деген мақсатта ұйымдастырдық. Жастар жағы ел мақтаған тұлғалардың ерлікке толы еңбегін жадынан шығармауы керек. Халық қаһарманы Тоқтар Әубәкіров ағамыздың кітапқа жазылмаған жеке тарихын өз сөзімен шынайы жеткізгені жиналғандар үшін үлкен олжа болды», деді «Жас сарбаз» жасөспірімдер әскери-патриоттық қозғалысы Нұр-Сұлтан қалалық филиалының төрағасы Асхат Налшыбек кездесуде сөйлеген сөзінде.
Кездесу соңында қонақтар Қарулы Күштердің Ұлттық әскери музейінде ұйымдастырылған «Ғарышқа жол» көрмесінің ашылу салтанатына қатысты.
