– Бұл жоба ұзақ мерзімге – 2021 жылға дейін жоспарланған. Біз осындай фестивальдарды түрлі тақырыптар бойынша жыл сайын өткізуді қолға алмақшымыз. Биылғы шараны жастарға арнауды жөн көрдік. Спикерлер ретінде танымал спортшыларды, бизнесмендер мен теологтарды шақырдық. Олар шеберлік сыныптар, семинарлар және жастарға тәжірибелік дәрістер өткізді, – дейді Теміртау қалалық мәдениет және тілдерді дамыту бөлімінің жетекшісі Айжан Шәкенова.
Фестивальда жастар үшін би бәсекесі, белсенді ойындар мен түрлі сайыстардан тұратын тимбилдинг бағдарламасы ұйымдастырылды. Сонымен қатар шара аясында Теміртау тарихи-өлкетану мұражайының қызметкерлері ХІХ ғасырдың орта шеніндегі қазақ қыстауын жаңғырту жобасын іске асырды. Олар малға арналған қора-қопсы, ас әзірлейтін, жүн тазалайтын, тері илейтін және ши тоқитын аумақ жасап, саман үйдің макетін құрастырды.
– Бұл жоба – біздің көпжылдық зерттеуіміздің нәтижесі. Адамдар қыстауларда күздің ортасынан мамырдың соңына дейін жылдың басым бөлігін өткізген. Біздің ата-бабаларымыз қандай жағдайда тұрғанын қайта жаңғыртып көрсетуді көздедік. Әрине саман үйді сала алмадық, тек оның макетін жасадық. Ішкі жабдықтар да айтарлықтай ұқсас болмады. Алайда басқа жәдігерлердің барлығы сол кезеңге сай жасалды, – деп атап өтті мұражай қызметкері Татьяна Хмелёва.
Шара барысында Теміртау қаласындағы жеке сектордың тұрғындары қойлары мен жылқыларын беріп, ұйымдастырушыларға көп көмек көрсетті. Қонақтарды қыстаудың маңында қарсы алған мұражай қызметкерлеріне арналған киімдер де маңайдағы ауылдардан жиналды.
Фестивальды қызықтап келген қонақтарға самаурыннан шай ұсынылды. Сонымен қатар олар ескі тәсілдер бойынша жүн түтіп, ши тоқып, ата-бабаларымыздың көнеден келе жатқан кәсібінің қыр-сырына қанықты. Ең бастысы, биыл ғана тұсауын кескен форум-фестивальға қатысушылар бір жарым ғасыр бұрынғы кезеңге саяхат жасап, тарихи сананы жаңғыртып, рухани мол олжаға кенелді.
Қайрат ӘБІЛДА,
«Егемен Қазақстан»
Қарағанды облысы,
Теміртау қаласы
