Мерекелік шараға басшылық еткен Мәжіліс Төрағасы кез келген қоғамда журналистердің орны ерекше екенін атап өтті.
«Елбасымыз Нұрсұлтан Назарбаев Тәуелсіздік алған алғашқы күннен бастап баспасөз саласының дамуына ерекше көңіл бөліп келеді. Мүмкіндігінше, барлық жағдай жасалып жатыр. Соның нәтижесінде, біздің еліміздің бұқаралық ақпарат құралдары тек Қазақстанда ғана емес, халықаралық, тіпті әлемдік деңгейде де жылдам ақпарат алатын және тарататын деңгейге көтерілді», деді Н.Нығматулин.
Сондай-ақ, Төраға қаламгер қауым күн демей, түн демей еңбек етіп, тәуелсіз Қазақстанымыздың дамуына өлшеусіз үлес қосып келе жатқанын да тілге тиек етті. Соның ішінде, Парламент Мәжілісінің заң қызметін бүкіл республикаға, еліміздің әрбір азаматына жеткізуде журналистердің еңбегі ұшан-теңіз екендігін айтты.
Осы еселі еңбекке деген құрмет ретінде өткен жылы палата Спикерінің тікелей бастамасымен Мәжіліс журналистерге арналған «Парламент сөзі» сыйлығын тағайындаған болатын. Мәжіліс Төрағасы атап өткендей, «Парламент сөзі» атауының да өзіндік мән-мағынасы бар.
«Өйткені, сөзге тоқтау, сөзді бағалау, сөзді қадірлеу – біздің бабаларымыздан келе жатқан қасиетті жол. Сіздер осы үлкен жолдың заманға сай қалыптасқан ақпараттық-насихат бағытын алып жүрсіздер. Сондықтан, сіздердің бүгінгі еңбектеріңіз – ертеңгі тарих», деді Н.Нығматулин.
Шара аясында журналистер арасында ұйымдастырылған осы байқауда үздік деп танылғандарға Парламент ғимаратының бейнесінде арнайы жасалған мүсіндер мен дипломдар табыс етілді. Атап айтқанда, «Парламенттік журналистиканы дамытуға қосқан үлесі үшін» аталымы бойынша «Халық Кеңесі» газетінің алғашқы редакторы Сарбас Ақтаев пен «Советы Казахстана» газетінің алғашқы редакторы Юрий Тараков, «Үздік телевизиялық сюжет үшін» аталымы бойынша «Қазақстан» телеарнасының тілшісі Индира Асанова мен «Хабар» телеарнасының тілшісі Асхат Ниязов, «Үздік баспа жарияланымы үшін» номинациясы бойынша «Айқын» газетінің тілшісі Айхан Шәріпов пен «Казахстанская правда» газетінің тілшісі Лаура Түсіпбекова марапатталды. «Үздік интернет және радио материалы үшін» аталымына «Zakon.kz» ақпарат агенттігінің тілшісі Оксана Скибан мен Қазақ радиосының ұжымы лайықты деп табылса, «Арнайы репортаж» аталымы «Астана» телеарнасының тілшісі Айгүл Шайхимова мен «Хабар 24» телеарнасының Жаңалықтар бөліміне тапсырылды.
Айрықша атап өтетініміз, «Үздік бейне-сурет материалы үшін» аталымы «Егемен Қазақстан» газетінің фототілшісі Ерлан Омаров пен «КТК» телеарнасының операторы Владислав Водневке бұйырды.
Естеріңізге сала кетейік, «Парламент сөзі» сыйлығын беру бойынша арнайы комиссия құрылып, оған Мәжіліс депутаты Қуаныш Сұлтанов жетекшілік етті. Журналистер қауымынан 80-ге жуық материал түсіп, олар мұқият іріктеуден өткізілген.
Нұрлыбек ДОСЫБАЙ,
«Егемен Қазақстан»
