Мұз үстінде зуылдайды көліктер

Облыс орталығындағы Усолка өзе­нінде мұз үстінде дуэльді автожарыс өтті. Бұл жолы «Бұрқасын-2017» атауына ауа райы да сай келді. Ақпанның ақ түтек бораны, аязына қарамастан, өзен үстін­дегі жарыс та қыза түсті. Авто­жарыс­қа Павлодар, Ақсу, Екібастұз бен Ас­танадан келген автошабандоздар қатысты. Дуэльді автожарыстың қысқы шоуын тамашалауға қала тұрғындары, жастар, қонақтар өте көп жиналды. Автожарыстағы көліктердің зулаған жылдамдықтары, қатысушылардың шабытты сәттері, шұғыл бұрылыстар жасайтын ғажайып көріністері көпшілікті таңғалдырды. Мұз үстіндегі автожарыс әрі ерекше, әрі қауіпті. Бірақ, соған қарамастан, экстремалды спортқа деген қызығушылықтары басым автошабандоздар жарыс көрігін қыздырып, көрермендердің де көңіліне қанат бітірді. Мұз үстіндегі бұл ерекше жарысты еліміздің Авто-Мото-Спорт федерациясы, қала әкімдігі, облыстық жастардың бастамаларын қолдау орталығының қолдауымен «RedZone» қоғамдық бірлестігі өткізді. Қысқы дуэльді автожарыс қорытындысы бойын­ша А.Виндерголлер, К.Чистяков, А.Бо­чин, Н.Қабдуәлиев, Ф.Рахметов және басқалары жеңімпаз атанды. – Биылғы жылғы «Бұрқасын-2017» автожарысы ЭКСПО-2017 халық­аралық көрмесін қолдау мақсатында өткізілді. «Бұрқасынға» қатысушылар саны жыл санап артып келеді, біз бұған өте қуаныштымыз. Өткізіліп отырған жарыстың мақсаты – автоспортты көп­ші­лікке тарату және жастардың авто­спорт­қа және саламатты өмір салтына деген қызығушылығын арттыру, – дейді «RedZone» қоғамдық бірлестігінің төрағасы К.Музалевский. Фарида БЫҚАЙ, «Егемен Қазақстан» ПАВЛОДАР Суреттерді түсірген Ольга МУЗАЛЕВСКАЯ