«Барыс» «Адмирал» командасын жеңді (видео)

Астананың «Барысы» Құрлықтық хоккей лигасының тұрақты чемпионатында Владивостокта жергілікті «Адмирал» командасымен кездесіп, 4:1 есебімен жеңіске жетті. Бірінші кезеңде Эдуард Занковецтің шәкірттері айдындағы ойыншы артықшылығын пайдаланып, есеп ашты. Оны 8-минутта Константин Пушкарев салды. Екінші кезеңде де қонақтардың мерейі үстем болды. Кэм Баркер мен Мартен Сен-Пьер жеткізген шайбаны Роман Старченко 31-минутта қақпаға дәл бағыттады. Үшінші кезең басталысымен алға ұмтылған айдын иелері небәрі 30 секундтың ішінде есеп айырмасын қысқартып үлгерді. «Адмирал» сапынан Вадим Краснослободцев мергендігімен танылды. Дегенмен, бұл гол оларды жеңілістен құтқарып қала алмады. Матчтың 55-минутында Дастин Бойд нәтижелі соққы жасаса, араға бір жарым минут салып, дубль иесі атанды. «Барыс» 41 ойыннан кейін 59 ұпай жинап, «Шығыс» конференциясында 7-орынға көтерілді. Елордалықтар келесі кездесуін 23 желтоқсан күні Челябинскінің «Трактор» командасымен өткізеді.