Қазақ күресі өркен жайып келеді

Биылғы 29 шілде күні газетімізде Қарағанды облысындағы меншікті тілшіміз Қайрат Әбілдиновтің ұлттық күресіміздің қазіргі жай-күйі мен келешегі туралы «Қазақ күресі: өзгерте бергеннен не ұтамыз?» деген мақаласы жарық көрген еді. Осыған орай редакцияға мақалаға үн қосқан хаттар келе бастады. Бүгін солардың біріне орын беріп отырмыз. Соңғы кезде еліміздің бас басылымы «Егемен Қазақстанда» қазақ күресінің жай-күйіне байланысты көптеген материалдар жарық көрді. Мұнда спорт мамандары мен қазақ күресінің жанашырлары аталған мәселеге байланыс­ты өздерін толғандырып жүрген жайттарды ортаға тастады. Осыған орай мен де екі-үш ауыз пікірімді айта кеткенді жөн көріп отырмын. Айтайын дегенім, кейінгі кезде Орал өңірінде де қазақ күресінің дамуына жаңа серпін берілді. Спорттың осы түріне деген оң көзқарас қалыптаса бастады. Соның нәтижесінде облыс­та ұлттық күрестің өркен жаюына қажетті барлық жағдайлар туғызылды десем артық кетпейтін шығармын. Бұл үшін бірінші кезекте қойылып отырған талаптарға сай жаттығатын орындар белгіленді. Сонымен бірге, қажетті спорттық құрал-жабдықтар толық жасақталды. Бүгінгі күні қайта жаңғырып келе жатқан ұлттық спорт түрлерінің ішінде осы қазақ күресіне деген халықтың назары ерекше болып отыр. Мұның өзі спорттың осы түрі бойынша әр түрлі деңгейдегі сайыстар мен жарыстарды көбірек ұйымдастыру қажеттігін көрсетеді. Мысалы, біз қыркүйек айының аяғында облыстық дене шынықтыру және спорт басқармасының қолдауымен «Жайықтың арыстары – қазақтың барыстары» атты республикалық турнир өткіздік. Аталған бәсеке батысқазақстандық қазақ күресінің өкілдерімен бірге оған жанашырлық білдіріп жүрген жанкүйерлердің мерейін де бір көтеріп тастады. Жалпы, қазақ күресінің кең өріс алып, серпінді түрде дамуына «Қазақстан барысы» жобасы игі ықпалын тигізіп келе жатқанын айта кеткен ләзім. Бұл үдерісті біздің өңірден де байқауға болады. Қазіргі таңда облысымыздың түпкір-түпкірінде төл спортымызға деген қызығушылық күн санап артып келеді. Алыстағы аудандар мен шалғайдағы ауылдарда балалар мен жастардың қазақ күресі үйірмелеріне көптеп келіп жатқаны да осы пікіріміздің бір дәлелі. Бұл жерде, әрине, бапкер-мамандардың жетіспеушілігі де байқалып қала­ды. Дегенмен, болашақта бұл тығы­рықтан жол тауып шығу жолдарын іздестіру– басты назарда болмақ.  Иват ЕРІШЕВ, Батыс Қазақстан облысының қазақ күресінен аға жаттықтырушысы ОРАЛ