Жабайы үйректің тосын «қылығы»

Жымпиты ауылының тұрғыны, зейнеткер Төлеген Есмұханов күнделікті әдетімен ұйқысынан ерте оянған соң, қорадағы малдарын өріске шығармақ болады. Малдарды кезекпен айдап, есіктен шы­­ғарып жүр­генде ол жем-шөп салатын шағын астау­ша ішінен ты­нымсыз шықы­лықтаған ба­ла­пандар­дың үні, іле-шала қанатын сабалап, бала­пан­­­дарын жан­ұшыра қорғаған жабайы үйректі көріп, аң-таң түрде тұрып қалыпты. Ғажап! Даланың жабайы үйрегі ауылдың ортасындағы үйдің қора-жайына қалай келді, осы жерге ұясын салып, балапандарын өрбітуінде қандай сыр бар екен?! Таң-тамаша күйде қалған Төлеген астауша ішіндегі малдың қалдық шөбіне ұя салған дала үйрегінің балапандарын қамқорлыққа алып, шағын ыдысқа су құйып, жем салып қоюды да ұмытпады. Бәлкім, балапандар жем жеп дағдыланса, бағымға ұстауға болар ма еді деген ойдың да келгені рас. Бірақ, ертеңгісін бәрі де басқаша болды. Ыдысқа құйылған жем-суға ауыз да тигізбеген үйрек балапандарын соңынан ертіп, кең далаға мамырлай басып кете барыпты. Зейнеткер Төлеген Есмұханов маусым айында мал қорасы ішінен он балапанын өрбітіп, өз мекеніне аман-есен аттанып кете барған дала үйрегінің бұл келісінің себебін түсінбесе де шаңырағында бақыт құсы қонғандай жақсылыққа жорып отыр. Лайым шынында жабайы үйректің бұл жұмбағы берекеге бастай бергей. Мүсірбек АЙТАШЕВ Батыс Қазақстан облысы, Сырым ауданы