Максим Головкин: Геннадий екеуіміз екі мәрте финалда кездескенбіз

Максим Головкин HBO телеарнасындағы «Golovkin — Jacobs 24/7» бағдарламасында бауыры Геннадий жайлы ой бөлісті. «Есімде, Геннадий екеуіміз бір салмақта жұдырықтасып, екі мәрте финалда бір-бірімізге қарсылас болғанбыз. Алғашында мен оған жол берсем, екіншісінде оның кезегі келген. Мен осылайша, Қазақстан чемпионы атанғанмын», – деп еске алды Максим Головкин. «Ол кезде тұрмысымыз сондай төмен болды деп айта алмаймын. Бірақ ұлттық құрамамен өзге елдерге бару үшін екеуімізге бірдей ақша табу қиын болатын. Сол кезде Геннадийдің көзінде ерекше бір жалынның бар екенін, боксқа деген құлшынысының менен жоғары екенін байқап, оған жол бердім. Бұл шешіміме өкінемін деп айта алмаймын. Қайта қазір бауырымды мақтан тұтамын», – деді ол. «10-20 жас аралығындағы жаттығу жұмыстарымыз, күн демей, түн демей жарыстарға дайындалғанымыз әлі есімде. Геннадий қазіргі жетістіктеріне қарамастан, әлі де биік белестерді бағындыра түскісі келеді. Бұл біздің қанымызда бар қасиет. Жеңілгенді жанымыз сүймейді», – деді қазақстандық боксшының ағасы.