Букмекерлер Головкиннің жеңісіне сенімді

Ирландияның Paddy Power букмекерлік кеңсесі орта салмақта WBA (Super), IBO, WBC және IBF тұжырымдары бойынша әлем чемпионы қазақстандық Геннадий Головкин (36-0, 33 КО) мен WBA (Regular) белбеуінің иегері америкалық Дэнниэл Джейкобс (32-1, 29 КО) арасындағы кездесуге ерекше бәс қабылдай бастады, деп хабарлады sports.kz. Бұл бәстің бір ерекшелігі шаршы алаңдағы оқиғалар мен раунд санынан бөлек нокдаундарға да ерекше назар аударып отыр. Головкиннің соққыларының бірі Джейкобсты нокдаунға түсіреді дегенге мамандар сенім артқан. Осы үшін 1,36 коэффициент белгілепті. Ал қос боксшы да нокдаун алады деген нұсқаға 6,00 қойып отыр, Айта кетейік, кәсіпқой бокста 36 кездесу өткізген қазақстандық былғары қолғап шебері бір де бір мәрте нокдаун алған емес. Ал америкалық Дэнниэл Джейкобс 2010 жылдың 31 шілдесінде WBO нұсқасы бойынша әлем чемпиондығы үшін ресейлік Дмитрий Пирогтан нокаутпен ұтылған. Айта кетейік, қос боксшының арасындағы жекпе-жек 18 наурыз күні АҚШ-тың Нью-Йорк қаласындағы Madison Square Garden аренасында өтеді.