Шетелдегі қандастарымыз да қалыс қалмайды

Дәстүрлі Жолдаудың: «Мен Қазақ­стан халқына жаңа дәуір қар­саңында сөз арнап отыр­мын», деп басталуы тегін емес. Мем­лекет бас­шысы «Бола­ша­ғын айқындап, сын-қатер­лерді күтіп отырмастан, оған табанды түрде қарсы тұра ала­тын халық қана жеңіске жете­ді. Әлемде кезекті, Төртінші өнер­кәсіп­­тік революция басталды. Эко­но­ми­каны жаппай цифрландыру тұтас сала­ның жойылуына және мүлде жаңа сала­ның пай­да болуына алып келеді. Біздің көз ал­ды­­мызда болып жатқан ұлы өзгерістер – әрі тарихи сын-қатер, әрі ұлтқа берілген мүм­­кін­­дік», дегенді жайдан-жай айтып отырған жоқ. Елдің жаһандық бәсекеге қабілеттілігін қамтамасыз ететін экономикалық өсім­нің жаңа моделін жасауда шетелдегі 5 мил­лионға жуық қандасымыздың әлеу­меттік, демо­гра­фиялық, мәдени, эконо­ми­калық және саяси әлеуеті де назар­дан тыс қалмайды деп үміт­тенеміз. Олар­мен мәдени қарым-қатынас орна­тып, ұлт­тық рухани тұрғыдан қолдау көр­сетіп жүрген Дүниежүзі қазақтары қауым­дас­тығы Елбасы Жолдауында айтылған Қазақ­станды жаңғыртудың бес негізгі басымдығын насихаттау және түсіндіру жұмысын жоспарға сай жүргізетін болады. Бұл бағытта жылдағы дәстүр бойынша, Жолдаудың мәтінін Қытайдағы қазақтар үшін Ахмет Байтұрсынов әліпбиі бойын­ша, Ресейдегі қазақтар үшін кириллица­мен, Еуропадағы қазақтар үшін латын әліпбиімен орыс, өзбек, моңғол, ағылшын және сұранысқа қарай өзге де тілдерге аударамыз. Оны шетелдегі ұлттық-мәдени орталықтар арқылы және Қауым­дастық ұйымдастыратын және оның атсалысумен өтетін түрлі құрыл­тайлар, конференциялар, дөң­гелек үстел жиындары мен мәде­ни, спорттық және тағы басқа да шараларда шетелдегі қан­дас­тарымызға тарататын боламыз. Сондай-ақ, Қазақстанның жетек­ші ғалымдары мен қоғам қайраткер­лерінің көмегімен түсіндіру, талдау, наси­хаттау жұмыстары жүргізіледі. Жалпы, Тәуелсіздік жылдары ата­жұртқа оралған 1 миллионға жуық қан­дасымыз Қазақстанның дамуына қомақты үлес қосқанын бүгінде ешкім жоққа шығар­майды. Оның ең маңыздысы олар­дың мем­лекет құраушы ұлттың кеңес­тік дәуірде құл­дырап кеткен үлесін, өзінің тарихи орнына қайта шығаруы деуге болады. Шетелден келген қандастарымыз өзімен бірге адами капиталын ғана емес, шетелдік қаржы мен технологияны инвестициялауға жол ашты. Бұл үрдіс алдағы уақытта да үзіліссіз өз жалғасын таба беретін болады. Бабаларымыздың «Елге ел қосылса – құт» деген нақылы осындай жағдайға орай ай­тылғаны күмәнсіз. Елдігіміздің баянды, мем­лекетіміздің бәсекеге қабілеттілігінің жоғары болуы тек қазақстандықтардың ғана емес, сыртта жүрген қазақтардың да асыл арманы. Талғат МАМАШЕВ, Дүниежүзі қазақтары қауымдастығы Төралқа Төрағасының бірінші орынбасары АЛМАТЫ