Қанат Робсонды нокаутқа түсірді

Сенбі күні АҚШ-тың Уилмингтон қаласында кәсіпқой бокстан бірінші орта салмақта өнер көрсететін жерлесіміз Қанат Ислам бразилиялық Робсон Асисті бірінші раундта нокаутқа түсірді. Спортшының карьерасы өнер адам­дарына қарағанда қысқа болады. Боксшыларға 30 жастан асқан соң, шаршы алаңда 12 раунд жұдырықтасып жүру оңайға соқпайды. Қазір Қанаттың жасы 32-де. Биыл 33-ке толады. Сондықтан чемпиондық белбеуге таласқанын қалаймыз. Әйтпесе уақыт өтіп барады. Бұл жолы Қанат бокс кешінің басты жекпе-жегінде емес, кіші Рой Джонс пен Бобби Ганни кездесуінің андеркардында өнер көрсетті. Қарсыласы осыған дейін шаршы алаңға 19 рет шыққан. Оның ішінде 16 жекпе-жекте жеңіске жетіп, үш рет ұтылған. Кәсіпқой бокста жүргеніне он жылдан асқан. АҚШ-та алғаш рет жұдырықтасты. Бұған дейін екі рет Канадада, бір рет Жаңа Зеландияда, қалған кездесулерін өз елінде өткізген. Әлемдік рейтингтегі көрсеткіші де аса мәз емес (boxrec.com сайтында 240-орын). Жерлесімізге Робсонды ұту қиынға соқпады. Бірін­ші раундта-ақ сұла­тып салды. Сөйтіп, қазақ боксшысы спорт­тық мансабында 23-жеңісіне қол жеткізді. Осындай кездесудің Қанатқа абырой әпере қоймайтынын Қазақстан кәсіпқой бокс федерациясының вице-президенті Виктор Демьяненко «Vesti.kz» сайтына берген сұхбатында айтыпты. – Мұндай жекпе-жек Қанат Исламға қажет емес. Жаңа биікке көтерілу үшін деңгейі жоғары боксшылармен жолық­қаны дұрыс. Қазіргі қарсыласы бірнеше мәрте жеңілген, рейтингі де жоғары емес. Мұндай қарсылас не үшін керек? Жалпы, осындай кездесулер Қанатқа не береді? – дейді Демьяненко. Бұл кәсіби маманның жанашыр­лықпен айтқан пікірі деп ойлаймыз. Қазақ халқы батыр ұлын жақсы көреді. Оның толағай табыстарға қол жеткіз­генін, әлемдік аренада бағы жанғанын көргісі келеді. Ендеше, Қанат және оның промоутерінің ойланғаны дұрыс болатын шығар. Бек ТӨЛЕУОВ, журналист АСТАНА