Қауіпсіз маршрут

Ол оқушылар мүддесіне қызмет етеді Өскеменде жүзеге асырылайын деп жатқан бұл игі бастама ауылдағы алаңсыз күндерді еріксіз еске түсірді. «Әй, ананың қабаған иті бар. Сол маңнан аулақ жүрші», «Ана көршінің ат қорасына жоламашы, жүгірмек. Теуіп жіберіп жүрмесін», дейтін қамқор әже, жанашыр әке-шеше сөздері қырда өскен жұрттың құлағынан кетпеген болар. Бұл жобаның мақсат-мұраты да осы. Өскемен қалалық про­кура­турасы мен білім бөлімі бір­лесе әзірлеген «Қауіпсіз бағыт» аталатын жоба аясында арнайы карта дайындалып жатыр екен. Картада оқушының үйден мектепке, мектептен үйге дейін қандай жолдармен, қандай көшелермен жүру керектігі, оқушы тұратын аудан мен білім алатын мектептің аумағы, сол маңайдағы қауіп тудыруы мүмкін деген орын­дардың барлығы тайға таңба басқандай көрсетілетін болады. Бұл қандай жерлер? Бұлар – сыраханалар, арақ-шарап сатылатын дүкендер, дұрыс жарықтандырылмайтын аумақ­тар мен көлік тұрақтарының маңайы. Құқық қорғау органдарының қызметкерлері кәмелетке тол­мағандарға қатысты қыл­мыс­тардың дені оқушылар сабақ­қа бара жатқанда немесе келе жатқанда орын алатынын айтады. Сондықтан бұл жобаның оқушылардың қауіпсіздігіне септігі тиетініне сенімді. 2016 жылдың желтоқсан айында қаланың барлық мектептерінде осы мәселені пысықтау мақсатында ата-аналар кеңесі өткізіліп, білім ұйымдарының өкілдері полицейлермен бірге мектепке дейінгі қауіпсіз бағыттардың жобасын әзірлепті. Жоба авторларының сөзіне сенсек, бұл карта шаһардағы әр мектептің оқушысына тап­сы­рылады. Яғни, бірде-бір оқу­шы назардан тыс қалмайды. Арнайы әзірленген карта қолай­­лы болу үшін оқушының күн­делігіне жапсырылмақ. Бұл жобаның тағы бір тиімді тұсы бар. Шаһардағы оқушылар үшін қауіпті деген жерлерге қатысты жинақталған деректер негізінде «Қала мектептерінің картасы» әзірленбек. Қала би­лігі осы карта арқылы кейбір көшелерге жарық орнатып, шаһардың кейбір тұстарындағы қалың ағаштарды кесу секілді жұмыстарды жүргізуді көздеп отыр. – Балалардың тәрбиесіне неге мектеп қана жауап беруі керек? Бұл мәселеге қоғам болып атсалысуымыз қажет деп жиі айтып жүретін едім. Міне, енді осы мәселеге құзыр­лы орындармен бірге біздің де атсалысып жатқан жайымыз бар. Қаладағы оқушылар­ға қолайсыз жерлердің бар­лы­ғын ата-аналармен бірге мұқият зерттедік. Бейнека­мера орнататын орындар­ды да анықтадық. Қақпағы ашық жатқан люктер мен иесіз үй­лерге дейін бірін қалдыр­­май картаға енгіздік. Өйткені, бала­ның қауіпсіздігі мәселе­сіне келгенде ұсақ-түйек, үлкен-кіші деген дүние болмауы керек, – дейді Өскемен қалалық білім бөлімінің басшысы Мәдениет Ах­метова. Қалалық білім бөлімінің басшысы картаны әзірлеу ба­рысында Өскеменде жарық­тандырылуға тиіс 1362 орынды анықтағандарын айтады. Егер жоба сәтімен жүзеге асатын болса, қаладағы оқушылардың қауіпсіздігімен қатар, кейбір тұрғындарды әуре-сарсаңға салып жүрген көшелерді жарықтандыру, тағы да басқа өзекті мәселелер өз шешімін табатын болады. Азамат ҚАСЫМ, «Егемен Қазақстан» Өскемен